Eksplosjonen skjedde utanfor eit nytt museum ved Giza-pyramidane. Pyramidane ligg i ørkenen ved byen Giza ved Nilen, rundt 25 kilometer sørvest for Kairo sentrum.
På sosiale medium er det publisert bilete som viser at bussen har fått store skadar.
Eit augevitne fortel til Sky News Arabia at ei bombe skal ha gått av idet turistbussen passerte museet i Giza.
Dei fleste av dei såra skal vere utanlandske turistar, ifølgje nyheitsbyrået Reuters. Ingen har førebels tatt på seg skulda for eksplosjonen.
Etter at president Mohamed Mursi blei avsett i 2013 har militante grupper gjennomført ei rekkje angrep i Egypt.
Det er også gjennomført fleire angrep mot sivile mål, først og fremst mot koptiske kyrkjer og kristne pilegrimar.
I desember blei tre vietnamesiske turistar og ein lokal guide drepne då ei bombe eksploderte i vegkanten.
Dei tre pyramidane i Giza er store turistattraksjonar. Ein av dei, Kheops-pyramiden, blir rekna som verdas mest kjende pyramide. Han inneheld grava til farao Khufu, og er eitt av verdas sju underverk.
Pyramiden stod truleg ferdig rundt 2580 f.Kr.