– Theresa May rekker ut ei hand til arbeiderklassen, men har utnemnt ei høgreorientert regjering

– Med utnemninga av Boris Johnson som utanriksminister, og «veteranhaukar» som David Davis og Liam Fox som høvesvis brexitminister og handelsminister, signaliserer Theresa May eit skifte mot høgre, skriv politisk redaktør i The Guardian, Heather Stewart. Ho meiner utnemningane er eit forsøk på å samle eit splitta parti, og gje det arbeidsro.

• Sjå heile den ny ministerlista i botn av artikkelen.

Stewart siterer talen til Theresa May i går, der ho strakte ut ei hand til arbeidsfolk. Og hintar til at det er eit misforhold mellom ord og handling når May samtidig utnemner veteranar på høgresida i det konservative partiet.

– Theresa May er pragmatikar

Theresa May har vore ein pragmatisk politikar i sentrum. Så retorikken er nok ektefølt, skriv Financial Times.

– I 2002 åtvara ho mot at folk hadde byrja å kalle det konservative partiet «det ekle partiet». Dette gav oss eit hint om at ho har ei liberal og reformvennleg side, skriv politisk redaktør i Financial Times, George Parker.

Samtidig er det kaos i opposisjonen, noko som opnar for at dei konservative kan ta veljarar frå Labour.

– Det er ekstraordinært at dei konservative, som har vore delt i synet på brexit, og som har fjerna toppleiinga si, ser ut til å vere meir samla enn Labour, skriv The Economist.

Viktig å samle partiet

Regjeringa til Theresa May har eit knapt fleirtal på 12 i parlamentet. Det skal ikkje store opprøret til på bakarste benk, for å skape problem.

Det er difor viktig å halde orden i rekkene. Ein politikar som David Davis, med fortid som innpiskar for John Major, har erfaring med å kontrollere opprørske parlamentsmedlem.

– Eg er svært glad for støtta frå David Davis i mitt prosjekt for å gje landet eit sterkt og samlande leiarskap, skreiv Theresa May på Twitter.

Distanserer seg frå Notting Hill-kretsen

Ministerutskiftingane byrja med at finansminister George Osborne fekk vite at han ikkje lenger var ønska. Osborne var nummer to i regjeringa, og ein nær alliert av David Cameron.

Sirkelen rundt Cameron blir kalla «Notting Hill-gjengen», ein indre sirkel av maktfolk som møttest til middag i det fasjonable nabolaget Notting Hill for å forme ut ny politikk. Snobbar med privatskuleutdanning.

Det blir no lagt vekt på at Theresa May gjekk på offentleg skule. Og ein etter ein blir no dette nettverket fjerna frå regjeringa. Den siste var justisminister Michael Gove.

6 av 21 i ny regjering er brexit-folk

I den nye regjeringa til Theresa May har 6 av 21 medlem markert seg som brexit-tilhengjarar forut for folkeavrøystinga 23. juni. Dei mest prominente tilhengjarane av brot med EU er Boris Johnson, Andrea Leadsom, Liam Fox og den nye brexit-ministeren David Davies.

Sju av de 21 i regjeringa er kvinner.

Følgande ministrar er utnemnde/ bekrefta

1. Theresa May, statsminister (var mot brexit)
2. Philip Hammond, finansminister (var mot brexit)
3. Boris Johnson, utanriksminister (for brexit)
4. David Davis, brexitminister (for brexit)
5. Liam Fox, handelsminister (for brexit)
6. Amber Rudd, innanriksminister (var mot brexit)
7. Michael Fallon, fortset som forsvarsminister (var mot brexit)
8. Chris Grayling, transportminister (for brexit)
9. Damian Green, arbeidsminister (var mot brexit)
10. Justine Greening, utdannings- og likestillingsminister (var mot brexit)
11. Liz Truss (Elizabeth Truss), justisminister (var mot brexit)
12. Jeremy Hunt, helseminister (var mot brexit)
13. Andrea Leadsom, miljø- og landbruksminister (for brexit)
14. Alun Cairns, fortset som Wales-minister (var mot brexit)
15. Karen Anne Bradley, kulturminister (var mot brexit)
16. Priti Patel, utviklingsminister (for brexit)
17. Greg Clarke, industri- og energiminister (var mot brexit)
18. James Brokenshire, Nord-Irland-minister (var mot brexit)
19. Sajid Javid, samfunns- og lokalminister (var mot brexit)
20. David Mundell, minister for Skottland (var mot brexit)
21. Patrick McLoughlin, kanslar for hertugdømmet Lancaster (var mot brexit)

I tillegg har desse møterett i regjeringa:

• Gavin Williamson – ny sjefsinnpiskar for dei konservative i Underhuset. Williamson var tidlegare privatsekretær for David Cameron (var mot brexit).
• David Lidington, leiar i Underhuset (var mot brexit).
• Baronesse Evans of Bowes Park (Natalie Jessica Evans) er leiar for dei konservative i Overhuset.
• Baronesse Anelay of St. Johns er statsministerens spesialutsending som skal arbeide for å hindre seksuelle overgrep under konfliktar.
• Robert Halfon er minister utan portefølje, og knytt til Statsministerens kontor (var mot brexit).

• Ben Gummer, minister og sjef for kontoret til statsministeren (var mot brexit).

• David Gauke, sjefssekretær i Finansdepartementet (var mot brexit)

• Anna Soubry, minister for små bedrifter og nyskaping (var mot brexit).
• Jeremy Wright, riksadvokat (var mot brexit).

Sjå heile lista på nettsida www.gov.uk

Oversikta over kven som var for og imot brexit byggjer på ei liste i tidsskriftet The Spectator.