Politiet fekk melding om brannen 04.17 måndag morgon om at det brann i ein vognhall på Rafnes industriområde i Bamble.
– Brannen har starta i ein skumbil, seier operasjonsleiar Aadne Røilid i Sør-Øst politidistrikt.
Skal finne brannårsaka
Han fortel at brannen var sløkt av brannvesenet før politiet kom til staden. Det blei også gjort skader på to andre brannbilar som stod i vognhallen.
– Det blei også store skader på vognhallen i brannen, seier Røilid.
Politiet trur brannen kan ha oppstått med sjølvantenning i skumbilen.
– Området er no avstengt, og politiet vil undersøke nærare for å få stadfesta brannårsaka, seier Røilid.
Ingen personskade
Sjefsvakt Arild Svendsen opplyser at brannalarmen gjekk klokka 04.00 på Rafnes Industriområde.
– Brannen blei sløkt relativt raskt av den interne brannberedskapen i samarbeid med Bamble brannvesen. Ingen personar blei skadd i brannen, seier Svendsen i ei pressemelding.
Han opplyser at brannen oppstod i den eine av brannbilane i garasjen.
– Den er påført betydelege skader. Dei andre innsatsbilane i garasjeanlegget blei redda ut med mindre skader.
Svendsen opplyser at brannberedskapen på industriområdet er fullt operative basert på ei utstyrsavtale med Bamble brannvesen.
