Fransk storavis: Fotball-EM 2020 blir utsett

Fotball-EM i 2020 blir utsett, skriv den franske storavisa L'Equipe.

UEFA skal ha eit møte neste veke. Der kjem dei til å vedta at heile EM blir utsett, skriv avisa.

Målet er at dei skal klare å gjennomføre dei europeiske cupane i år, og at ein dermed brukar datoane som var sett opp til EM-sluttspelet som skulle starte i mai.

Treng ekstraordinære tiltak

Noregs Fotballforbund skriv i pressemelding torsdag ettermiddag at toppfotballen i Noreg blir stoppa i fyrste omgang til etter 15. april.

Dette inneber at alle planlagde kampar i dei øvste divisjonane i norsk fotball er utsett. Treningskampar blir heller ikkje spelt frå og med 13. mars.

– Noreg er i ein situasjon som krev ekstraordinære tiltak. Me er ein del av samfunnet og har lyst til å spele fotballkampar. Det blir økonomiske store utfordringar for klubbane, men prioritet nummer ein er helse og me ynskjer å bidra så godt me kan, seier direktør i Norsk toppfotball, Leif Øverland til NRK.

Offisielle kampar vil tidlegast starte opp igjen fyrste helga i mai, skriv NFF. Målet er at både serie og noregsmeisterskap skal bli gjennomført, men korleis vil ein kome tilbake til.

Generalsekretær i Noregs Fotballforbund Pål Bjerketvedt seier til NTB onsdag at ein endeleg avgjering rundt Noregs EM-omspillskamp mot Serbia, truleg blir tatt tysdag neste veke.

Da deltek han i eit telefonmøte med representantar frå andre europeiske forbund i UEFA-regi. Det blir også diskutert kva som skjer EM-sluttspelet som etter planen skal starte i juni. Noregs kamp er planlagt spelt 26. mars på Ullevaal stadion.

Spanske Marca melder at både meisterligaen og Europaligaen er utsett med umiddelbar verknad. Avisa seier at ennå ikkje er kome nokon offisiell kunngjering frå UEFA, men at det vil kome om kort tid.

Ekspert: – Må stoppe liga når spelarar er i karantene

Den spanske ligaen er også utsett og heile laget til Real Madrid er sett i karantene.

Bjørg Marit Andersen er professor i medisin og tidlegare sjukehushygienikar og smitteoververnlege på Ullevål. Ho forklarer kvifor ein stoppar ein heil liga sjølv om det berre er ein spelar som er smitta eller lag i karantene.

– Det er heilt riktig å sette heile laget i karantene, det må alle tenkje på. Viss dei ikkje gjer det, fylgjer dei ikkje vanlege rutinar, seier ho om at lag blir sett i karantene dersom ein spelar er smitta.

Ho forklarer det med at dette er ein luftvegsinfeksjon som smittar svært lett.

– Når det gjeld luftvegsinfeksjon er det ikkje berre smitte ved dropar og kontakt frå ein person, men også når ein nys og hostar. Studie viser at da kjem det bitte små dropar, opptil ni meter ut i lufta rundt ein person, forklarer Andersen.

Engelsk fotball er uviss

Kva som skjer i Premier League er framleis uvisst. Onsdag kveld blei storkampen mellom Manchester City og Arsenal utsett på grunn av at fleire av Arsenal-spelarane skal ha vore nær Olympiakos- og Nottingham Forest-eigar Evangelos Marinakis da London-klubben møtte Olympiakos i Europa League nyleg.

The Times skriv torsdag at alle Premier League-kampar frå nå av vil gå for tomme tribunar.
Det som derimot er usikkert er kva som skjer viss ein ser seg nøydd til å avbryte sesongen. Premier League-reglane seier etter kva NRK forstår ingenting om dette.

Daily Telegraph skriv at det ikkje er «noko garanti» for at Liverpool blir kåra til meistrar dersom ein ser seg nøydd til å avslutte sesongen. Jürgen Klopps menn leiar ligaen med 82 poeng, heile 25 framfor andreplasserte City. Liverpool har ni kampar igjen medan City har ti.

Det er heller ikkje openbert kva lag som rykkjer ned. Per nå ligg Joshua Kings Bournemouth, Aston Villa og Norwich på høvesvis 18-, 19- og 20.-plass, men det er svært jamt i botnen. Heile seks lag ligg mellom 21 og 29 poeng.

Ifølgje goal.com har Premier League-sjefane fortløpande samtaler om kva slags grep som skal bli tatt, og korleis dei eventuelt løyser det viss sesongen må bli avslutta før alle kampane er blitt spelt.

Telegraph-journalist Jason Burt skriv på Twitter onsdag ettermiddag at tre spelarar frå ein ikkje-namngjeven Premier League-klubb blir testa for korona.

Same Burt skriv i denne saka at det er eit stort press på ligaen om å droppe kampar.