Bogeskyttar-protest mot at alkohol er ute av dopinglista

Frå nyttår står ikkje lenger alkohol på den internasjonale lista over dopingmiddel.

Bueskyting

INGEN ALKOHOL: - Vi vil framleis bannlyse alkohol frå våre konkurransar, og det er litt lettare å få det til om vi har WADA-lista i ryggen, seier Eva Thesen

Foto: Harry How / AFP

Den reviderte dopinglista blei offentleggjort fredag. Der er alkohol tatt bort. Men det er det ikkje alle som set pris på.

– Vi vil at alkohol framleis skal stå på dopinglista. Vi vil ikkje tillate alkohol brukt i konkurranse i samband med vår idrett, og det gjer det lettare å implementere reglar dersom vi har WADAs dopingliste i ryggen, seier Eva Thesen til NRK.

Ho er styremedlem i det internasjonale bogeskyttarforbundet World Archery.

– Det gjer det nok også for dei nasjonale forbunda å følgje opp det på sine stemne ved å vise at det når som helst kan bli testa for alkohol saman med andre dopingtestar. Det er lettare dersom vi kan vise til WADA-reglementet.

– Ein kombinasjon vi ikkje vil ha

Bueskyting

EPISODAR: World Archery har hatt eksempel på stemne der det har blitt kombinert alkohol og idrett. Derfor vil dei framleis ha alkohol på dopinglista

Foto: JEWEL SAMAD / Afp

Thesen meiner også at bogeskyttarforbundet gjerne går i bresjen for å vise at alkohol ikkje har noko med idrett å gjere.

– Det har vore ein del stemne i vår idrett opp gjennom åra der det har blitt kombinert alkohol og idrett. Det er ein kombinasjon vi ikkje vil ha, seier Thesen.

Derfor har alle dopingtestar innan bogeskyting hittil også omfatta testing for alkohol.

Dopinglista er endeleg vedteken. Men styret i World Archery skal diskutere vegen vidare på sitt møte 12. oktober.

I dag er alkohol rekna som doping i fire idrettar: Luftsport, motorsport og powerboating, i tillegg til bogeskyting.

– Oppfyller kriteria for dop

World Archery er skuffa over forbodet.

– Vi beklagar avgjerda, fordi vi meiner alkohol oppfyller alle kriteria som skal til for å vere på dopinglista, skriv generalsekretær Tom Dielen.

For at eit stoff eller ein metode skal stå på dopinglista, må det oppfylle to av tre kriterium:

  • Ha potensial til prestasjonsforbetring
  • Utgjere ein helserisiko for utøvaren
  • Skade idrettens omdømme

Dielen slår også fast at forbundet vil halde fram med å bannlyse alkohol.

– Vi håpar å auke talet på alkoholtestar på nasjonale nivå, seier han.

Prestasjonsfremjande i små dosar

Den medisinske komiteen i World Archery gjennomførte på 80-talet ein studie som viste at små mengder alkohol kan ha prestasjonsfremjande effekt i bogeskyting.

– Ein kan vel tenke seg at litt alkohol kan vere prestasjonsfremjande, og litt meir alkohol er ikkje lenger det, slår Thesen fast.

No vil World Archery gjennomføre nye testar.

Mindre mengder alkohol kan verke avslappande og redusere hjartefrekvensen.

– Vi skal framleis ha ein rein sport, og det inkluderer eit forbod mot bruk av alkohol under konkurransar, skriv Dielen.

WADA grunngir sitt vedtak med at det gir dei enkelte forbunda større spelerom med å lage tilpassa reglar for å forhindre alkoholbruk. Nasjonale antidopingorganisasjonar skal ikkje lenger styre reglane og handhevinga, men kan hjelpe til der dei nasjonale særforbunda ber om det.

Siste nytt

  • Vant gull i karate under ungdoms-OL

    Annika Sælid (17) fra Sentrum Kampsportklubb i Sarpsborg vant torsdag gull i kvinnenes +59-kilosklasse under ungdoms-OL i Buenos Aires.

    Hun vant alle sine tre innledende gruppekamper.

    Annika Sælid
    Foto: Pøbel Film
  • Jacob Noer scora to i sterk siger

    Lillehammer Ishockey tok ein sterk siger over Manglerud Star torsdag. Fjorårets «Get Rookie of the Year» Jacob Lundell Noer scora to av Lillehammers mål.

    NM Ishockey 4. Semifinale: Lillehammer - Sparta (5-1)
    Foto: Fredrik Hagen / NTB scanpix
  • Kloster Aasen skal vurdere søkere

    Det norske IOC-medlemmet Kristin Kloster Aasen har fått plass i evalueringskomiteen som skal vurdere kandidatene til vinter-OL i 2026. Calgary i Canada, italienske Milano/Cortina d'Ampezzo og Stockholm i Sverige er søkerbyene.

    Visepresident i Norges Idrettsforbund Kristin Kloster Aasen under et åpent møte i idrettsstyret på Olympiatoppen torsdag ettermiddag.
    Foto: Jon Olav Nesvold / NTB scanpix

Sendeplan

Kl. Program Kanal