– Uavhengig av utfallet av pågåande personalkonflikt, har ikkje Buskerud skikrets tillit til at sittande skistyre vil vere i stand til å gjenopprette nødvendig tillit og omdøme ovanfor sponsorar, frivillige, aktive og alle andre som er opptatt av skisporten, seier Steinar Berthelsen som er leiar i Buskerud skikrets til NRK.
Han og styret krev difor at det blir eit ekstraordinært skiting i Norges Skiforbund. Det kjem fram i eit brev dei i dag har sendt til forbundet sentralt.
Kretsen i Buskerud har tidlegare teke opp tema med forbundet, utan at dei meiner at dei har sett nokon betring i situasjonen.
SKITING: Skipresident Erik Røste og resten av styret i Skiforbundet kan bli kasta om Buskerud skikrets får gjennomslag for eit ekstraordinært skiting.
– Vi kan ikkje sjå at skistyret har forstått og tatt konsekvensen av den omdømekrisa vi har hamna i. Etter vårt skriv opplever vi at saka dessverre har utvikla seg ytterlegare i negativ retning, står det vidare i brevet.
Skiforbundet har uttrykt ovanfor kretsen i Buskerud at dei vil igangsette tiltak for å løyse den pågåande konflikten med Clas Brede Bråthen.
– Vi kan ikkje sjå at skistyret har vore i stand til å sette i verk tiltak for å løyse personalsaka eller gjennomført tiltak som kan betre vår organisasjon omdøme som vi oppfattar å vere i fritt fall, står det i brevet som er signert eit samla styre.
Kommunikasjonssjef Espen Graff i Norges Skiforbund stadfestar i ei tekstmelding til NRK at dei har teke imot brevet frå Buskerud.
– Det er planlagt møte med både kretsleiarar og skistyret seinare denne veka og dette blir tema då, skriv Graff.
Akershus har tillit
Akershus skikrets har også hatt et møte onsdag kveld. Styremedlem Dag Helland-Hansen i Akershus skikrets bekreftar overfor NRK at dei ikkje vil komme med eit mistillitsforslag mot det sittande skistyret.
Dei vil heller presentere eitt forslag til løysing, som vil bli diskutert på kretsleiarmøte førstkommande helg.
– Vi meiner at denne løysinga vil vere betre enn eitt mistillitsforslag, skriv Akershus skikrets i ein utsegn.
Krev opprydding
Også Oslo skikrets har sendt eit brev der dei ber om at Skiforbundet ryddar opp i saka som går føre seg med Clas Brede Bråthen.
– Heile prosessen er dessverre blitt negativ for oss som organisasjon. Inntrykket er at saka har blitt handsama på ein svært uheldig måte, står det i brevet som er signert kretsleiar Gudbrand Bakke og Atle Rolstadaas og som NRK har fått tilgang til.
BEKYMRA: Atle Rolstadaas er nestleiar i Oslo skikrets og har signert brevet til Skiforbundet.
Foto: Thomas Brun / NTBSkikretsen i Oslo presiserer at dei ikkje vil meine noko om innhaldet i den pågåande konflikten, men stiller likevel tre konkrete krav til styret i Skiforbundet.
- Sjå eit meir synleg skistyre framover – både intern i organisasjonen og i det offentlege rom.
- At det blir tatt aktive grep knytt dei interne forhold som står fram som kritikkverdige, og at vi blir orientert om desse på kommande kretsleiarmøtet.
- At skistyret legg fram forslag til tiltaksplan på kretsleiarmøtet for korleis vi som organisasjon saman skal endre bilete av skiidretten slik det no står fram.
Bryt ned omdøme
– Vi er svært bekymra for situasjonen. Gjennom media er det teikna eit bilde av norsk skiidrett som i stor grad bryt ned vårt omdøme, vår tillit og vår truverdigheit, heiter det vidare i brevet.
Det blir også peika på at det er kome fram i media at det er eit dårleg arbeidsmiljø prega av mobbing, ein ukultur i organisasjonen og interne konfliktar.
FORSTÅR: Visepresident Eva Tine Riis-Johannessen stadfestar at ho har teke imot eit brev frå Oslo skikrets.
Foto: Terje Bendiksby / NTBBakke har ikkje ville la seg intervjuet av NRK om innhaldet i brevet i dag. Men Visepresident i Skiforbundet Eva Tine Riis-Johannessen, som var til stades på møte i går, stadfestar at dei har teke imot brevet.
– Vi har stor forståing for den bekymringa som blir uttrykt frå Oslo skikrets og vi kjem til å ta dette med oss til møtet med alle kretsleiarar på fredag, der dette vil bli diskutert, seier Riis-Johannessen til NRK.
