FIS bekreftar: Gjer drastiske endringar før sesongavslutninga

Det vil berre bli lov å bruke éin dress resten av sesongen.

Det kjem det fram i ei melding som landslaga fekk tilsendt tysdag kveld og som NRK siterer frå.

Onsdag bekreftar Det internasjonale skiforbundet (FIS) endringane, før dei seint onsdag kveld publiserte dei nye endringane på sine sider.

Desse vil tre i kraft umiddelbart grunna alvoret i situasjonen i Trondheim helga som var, ifølgje FIS sin kommunikasjonsdirektør Bruno Sassi.

Vidare seier dei nye reglane:

• Drakta kan veljast blant dei «chippa» draktene som er brukt i løpet av sesongen.
• Utøvarane kan også ha ein ekstra dress tilgjengeleg – i tilfelle den opphavlege blir skadd og ikkje kan fiksast.
• FIS sin utstyrskontrollør vil sjekke dressane individuelt før rennet i Holmenkollen torsdag.
• For resten av sesongen vil FIS ta vare på dressane, og dei kan hentast av utøvarane rundt 30 minutt før trening eller konkurranse.
• Dressane må deretter leverast inn igjen 30 minutt etter hoppinga.

Det er ukjent korleis regelendringa påverkar Noreg, som har levert inn sine dressar til FIS.

– Manipulasjon frå A til Å

Regelendringa skjer i kjølvatnet av hoppskandalen i VM i Trondheim i helga, der fleire nordmenn vart diskvalifiserte frå storbakkerennet.

Hendinga har ført til at enkelte utanlandske utøvarar er skeptiske til å møte nordmenn i Raw Air i Holmenkollen og Vikersund denne veka.

– Eg har faktisk lite lyst til å møte ein nordmann i hoppbakken. Ikkje fordi det er nokon sin personlege feil, men fordi denne manipulasjonen frå A til Å har gått for langt.

Det seier Andreas Wellinger til ServusTV.

Tyskaren tok sølv i normalbakken i ski-VM i Trondheim – bak Marius Lindvik.

I storbakken hoppa Lindvik eigentleg ned til sølv, men vart etter rennet altså diskvalifisert for juks.

Kjøper ikkje forklaringa

Torsdag startar Raw Air i Holmenkollen.

Der skulle altså Wellinger helst sett at han ikkje skulle møte Marius Lindvik, Johann André Forfang og dei andre hopparane.

Søndag bekrefta sportssjef Jan-Erik Aalbu at støtteapparatet hadde sydd inn ein forsterka tråd i dressane til Lindvik og Forfang.

Håpet var at det ikkje vart oppdaga i utstyrskontrollen. Han presiserte at han sjølv ikkje kjende til jukset.

Etter den spesielle pressekonferansen søndag har saka eksplodert i både norske og internasjonale medium.

Både Lindvik og Forfang har uttala at dei ikkje kjente til juksinga med hoppdressane.

Den forklaringa kjøper ikkje Wellinger, som viser til si eiga erfaring dei 12 siste åra.

– Dersom eg tar på meg hoppdrakta og merkar at noko er annleis, då spør eg kva som er endra, seier Wellinger til ServusTV.

Wellinger ønsker derimot ikkje å ta stilling til om han eigentleg burde ha fått gull for innsatsen i normalbakken.

– Sjølv om eg skulle ha fått tilsendt gullmedaljen ein dag, så har eg ikkje fått høyre nasjonalsongen. Bileta og kjenslene vil ikkje vere der, seier Wellinger, og legg til at han ikkje trur han får tilkjent gullet.

Mange er tause

Det er ikkje mange aktive utøvarar som har uttala seg om hoppskandalen.

NRK var måndag i kontakt med det japanske teamet i Holmenkollen.

Dei ønsker ikkje å kommentere saka.

USA sin norske landslagstrenar Tore Sneli kallar saka for ein stor skuffelse.

– Det er trist for norsk hoppsport og for hoppsporten generelt. Vi blir veldig lei oss for dei smertene det påfører oss som er glade i hoppsporten, seier Sneli.

Han seier USA ikkje hadde nokon aning om kva som hadde skjedd.

– Folk trur ikkje på dei

Toni Obendorfer, hoppkommentator for den austerrikske allmennkringkastaren ORF, seier at den gjengse oppfattinga i Austerrike er at dei fleste ikkje trur på Johann André Forfang og Marius Lindvik.

– Folk trur ikkje på at dei ikkje visste noko. Det gjeld både folk flest og ekspertar, seier Obendorfer.

Han slit personleg med å sjå kvifor Marius Lindvik berre skulle ha ein ulovleg hoppdress under rennet i storbakken.

– Han vann i normalbakken. Så kvifor endre noko før storbakken? Eg ser ikkje nokon grunn sjølv til å endre noko, seier kommentatoren.

Han er heller ikkje sikker på at hoppskandalen er over.

– Eg kan ikkje sjå vekk frå at fleire nasjonar er involverte. Dette kan vere toppen av isfjellet, meiner Toni Obendorfer.

Vil bygge opp igjen tilliten

NRK har lagt fram kritikken frå Andreas Wellinger til sportssjef for det norske hopplandslaget, Jan-Erik Aalbu.

Han svarer at han ikkje fått gjort noko med kva andre meiner om situasjonen det norske laget har hamna i.

– Det som har skjedd, det har skjedd. Vi har kome med ei forklaring på kva som har skjedd, og vi legg oss paddeflate. No tek vi tida til hjelp for å bygge opp igjen tillit både nasjonalt og internasjonalt, seier Aalbu.

Når det gjeld kritikken frå Toni Obendorfer, svarer sportssjefen slik:

– Eg har prata med dei norske hopparane og stolar på det dei seier. Eg vil ikkje spekulere utover det, seier Aalbu.

– Hopparane sitt val

Aalbu legg til at han har fått beskjed om at det med sikkerheit ikkje har skjedd juks før konkurransar tidlegare i sesongen.

Både Marius Lindvik og Johann André Forfang er påmeldt Raw Air, som startar i Holmenkollen torsdag og held fram i Vikersund.

Jan-Erik Aalbu seier at det frå hans side ikkje er gjort noko for å hindre dei i å delta.

– Når dei etter så tøffe dagar ønsker å konkurrere, så er det deira val. Så langt ser det ut som dei skal delta.

Det blir jobba kontinuerleg med å lande på korleis det norske støtteapparatet vil sjå ut under Raw Air.

Hovudtrenar Magnus Brevig, assistent Thomas Lobben og skreddaren Adrian Livelten er suspenderte.

Varslar omfattande gransking

Michel Vion, generalsekretær i FIS, seier til NRK måndag kveld at granskinga av den spesielle saka startar snart.

Det er rett nok ikkje FIS sjølve som vil gjennomføre granskinga, men eit eksternt firma dei leiger inn.

– Etterforskinga vil starte i løpet av dei neste dagane, og den kjem til å ta tid, truleg fleire veker, varslar Vion.

Han bekreftar også at FIS har samla inn hoppdressane til dei norske hopparane og kombinertutøvarane.

Dei som skal gå gjennom saka kjem også til å gå gjennom alle videoar dei har fått. Det er også mange personar som skal intervjuast.

Michel Vion bekreftar også at det berre er dei norske utøvarane som skal granskast.