Huddersfields geniale sesongoppkøyring: Campingliv i svensk villmark

I førre sesong var dei nummer 19 i Championship i England. I går blei dei klare for Premier League, og sesongoppkøyringa på ei knøttlita øy utanfor Ed i Dalsland var sterkt medverkande til det.

Tyske David Wagner kom frå Borussia Dortmund og tok over managerjobben i Huddersfield i november 2015. Han redda dei frå nedrykk i fjor.

Straks sesongen var slutt og sommarvindauget opna, kjøpte Wagner inn 13 relativt unge og ukjende spelarar. Deretter tok han med seg heile troppen til Sverige på campingtur.

– Vi kom ut av komfortsonene våre, og det var svært vellukka, sa Wagner. – «The Lads» blei knytta saman til ei samansveisa gruppe.

Ukjent mål

Ved avreise visste ikkje spelarane kvar dei skulle. Det fekk dei vite då dei kom fram: Camping på ei øy ved Ed – ei øy på storleik med ei halv fotballbane.

Straks dei var framme, måtte spelarane levere frå seg telefonane og det meste av det andre dei hadde teke med seg.

I fire dagar levde dei i tomannstelt, fiska og laga maten sjølv på primus og bålpanne. Utan straum, mobil og toalett. Og utan ball.

Dei fekk og oppgåver dei måtte løyse i fellesskap ute i villmarka.

– Godt, men tøft

– Det var godt, men tøft. Eg kan ikkje seie eg greidde å nyte det, men det var godt å lære alle å kjenne, sa lagkaptein Mark Hudson til klubbens nettside etterpå.

– Vi levde tett på kvarandre 24 timar i døgnet, og vi samarbeidde og kommuniserte på ein måte som vi elles ikkje hadde gjort, seier Hudson.

Sammensveisa

Etter overlevingsturen i den svenske villmarka var laget uvanleg samansveisa då sesongen tok til.

Etter femteplassen på tabellen og straffesiger over Sheffield Wednesday i semifinalen, kunne 39.000 tilreisande Huddersfield-fans på Wembley juble uhemma då Christopher Schindler sette inn den avgjerande straffa måndag.

Ironisk nok var Schindler den einaste som ikkje var med på villmarkscampen i Sverige. Papirarbeider med hans overgang var ikkje avslutta då resten av laget reiste.

Ikkje overraska

Eirik Aase er redaktør av nettstaden championshipnorge.com og ein av dei som kjenner nest øvste nivå best her i landet.

– Campingturen til Sverige er ein del av bakgrunnen til Huddersfields suksess, men det viktigaste trur eg var Wagners spelarkjøp, seier Aase til NRK.

– Han visste kva han hadde bruk for, og kjøpte dei straks han hadde sjansen, før konkurrentane var komne i gang. Dermed hadde dei ein gjeng der alle kjende kvarandre allereie i treningskampane. Eg forstår ikkje kvifor andre klubbar ikkje gjer det same, seier Aase.

Terminlista skal offentleggjerast 14. juni.