– Denne ruta knyter to særs spennande reiselivsregionar saman. Begge regionane har stor andel norske turistar, seier kommunikasjonsdirektør i flyselskapet, Richard Kongsteien til wideroe.no.
Frå og med 1. september vil det gå fly frå Sørlandet til Trøndelag fredagar og søndagar.
Helgeruter
– Denne direkteruta opnar for turiststraumar som tidlegare har vore avgrensa av lang reiseveg og manglande direktesamband, seier han.
I første omgang er det altså snakk om helgeruter på strekninga. Men direktøren utelukkar ikkje fleire avgangar etter kvart.
– Vi har stor tru på ruta og våre kundar kan stole på at vi vil auke tilbodet i takt med at etterspurnaden aukar, seier han.
Lufthamnsjef Thomas Langeland på Kjevik er nøgd med å ha den nye ruta på plass.
Fire direkteruter
– Det er eit særs spennande tilskot til veksten lufthamna opplever og dei mange destinasjonane som no vert tilbode direkte frå Kristiansand lufthavn, skriv han i ei pressemelding.
Widerøe har dermed direkteruter frå Kjevik til Stavanger, Bergen, København og Trondheim.
