– Vi kan sette fingeren på mykje som burde ha vore betre, men dette er ein treningskamp. Ei veke no med gode førebuingar så er vi klar for eliteserien, seier Start-trenar Steinar Pedersen til NRK.
Etter ein kjedeleg første omgang tok 1. divisjonsklubben frå Vestfold leiinga på Sør Arena tre minutt ut i andre omgang.
Erik Mjelde sitt frispark gjekk rett i mål bak Håkon Opdal i Start-buret.
Passive og ustrukturerte
Eit kvarter seinare var Mjelde frampå igjen, og burde ha dobla for gjestene frå Sandefjord.
Men ei fantastisk redning av Opdal hindra eit nytt Sandefjord-mål.
Ti minutt før slutt vart Kjell-Rune Sellin spelt gjennom og kom aleine med Håkon Opdal. Sellin vann duellen og la på til 2-0.
– Det som kjem neste helg vert noko heilt anna enn det vi har vore gjennom til no. No skal vi konkurrere om poeng. I dag vart vi litt passive og ustrukturerte, seier Pedersen.
Skal samle overskot
– No handlar det om at gutane skal ha masse overskot og energi til å prestere i ein kamp som tel. No handlar det om å terpe på detaljar. Vi har ei veke igjen og er klar til neste søndag, seier han.
Så gjenstår det å sjå om uttrykket «dårleg generalprøve gjer god premiere» gjeld for Start når dei tek imot Lillestrøm heime på Sør Arena neste søndag.
– Eg gler meg. Vi ser fram til kampen mot Lillestrøm, seier Start-trenaren.