EFTAs overvakingsorgan ESA har tidlegare konkludert med at det norske vannscooterforbodet strir mot EØS-regelverket.
Joachim Verdich er skuffa over lagmannsretten, som dermed trassar ESA sin konklusjon.
– Veldig skuffa
– Eg er veldig skuffa over at dei ikkje har drege inn EØS-rettslege prinsipp, som vi meiner skal overstyre norsk lov, seier Verdich.
ESA meiner at det ikkje skal vere lov å skilje mellom vannscootarar og andre motorbåtar.
Lagmannsretten valde likevel å følgje gjeldande norsk lov for fritids- og småbåtar, som i praksis forbyr vannscooterkøyring dei fleste stader.
No vurderer Verdich å følgje saka vidare i det norske rettssystemet.
Vurderer høgsterett
– Eg ynskjer å konferere med mine vener og advokaten min. Men eg trur det blir til at vi ikkje gir oss i denne omgang, og prøver å løfte det vidare til høgsterett, seier han.
Stortingsrepresentant Bård Hoksrud frå Framstegspartiet vil no ha ei opprydding.
– Eg forutset at miljøvernministeren sørgjer for at dei får rydda opp i dette, og tek rundane som må til med ESA. Vi må få vite kva som er dei faktiske forhold, seier Hoksrud til NRK.
- LES: Anker vannscooterdom
– Det er fullt mogleg å køyre med vannscooter i heile EU. Det er tullete at det berre er Norge som skal sitje på haugen vår og ha håplause reglar som i dag, seier stortingsrepresentanten.
Miljøverndepartementet ynskjer ikkje å kommentere ei sak som går føre seg i rettsapparatet.