Opna småkraftverk: – Viktig for å halde oppe busettinga i distrikta

– Før dette starta for vel to år sidan trudde eg ikkje dette anlegget skulle bli noko av.

Det seier Ole Morten Vegusdal, som er blant elleve grunneigarar for Flateland kraftverk i Birkenes kommune i Agder.

Det er eit av dei største småkraftverka i landet.

Der skal det produserast straum som tilsvarar det årlege energiforbruket til 2500 husstandar.

Vegusdal fortel at det har vore ein lang veg å komme seg til opninga.

– Det går heilt tilbake til 90-talet. Mange år var det heilt stillstand, låge energiprisar og ikkje lønnsemd. Men plutseleg small det, seier han.

Viktig for distriktet

Dagleg leiar for kraftverket, Carl Fredrik Lehland, fortel at det er eit stort småkraftverk.

Det produserer 47 GWh, meir enn til heile Birkenes kommune.

Kraftverket har ei investeringsramme på over 300 millionar kroner.

Lehland seier det er herleg at kraftverket endeleg er i drift, men at det har vore komplisert.

– Den største utfordringa i dag er den lange saksbehandlingstida for å få alt godkjent, seier han.

Han meiner småkraftverka ikkje blir prioriterte, og at dei er ein viktig del av miksen og det som kan realiserast på kort sikt.

– Vi meiner at småkraftverk er viktig for å halde oppe busettinga i Distrikts-Noreg. Dei vert gjerne bygde konfliktfrie og gir relativt store bidrag til lokalsamfunna, seier han.

Fekk Stort(ting)fint besøk

Stortingsrepresentant Gro Anita Mykjåland (Sp) var med opninga denne veka.

Ho fortel at det er fantastisk at kraftverket er i gang med å produsere meir kraft i Agder.

– Vi er veldig glade i småkraftverk. Dei lokale grunneigarane får nytte sine verdiar på gard og grunn. Småkrafta, har ei heilt sentral rolle framover, seier ho.

Fleire innan småkraftbransjen meiner det tek for lang tid og at tilrettelegginga er for dårleg.

Mykjåland fortel at dei har løyvd ein halv milliard for å auke kapasiteten for saksbehandlinga.

– Eg meiner at vi no må byrje å sjå på kven som skal behandle desse konsesjonane i framtida, seier ho.