Hydro-fabrikk kuttar straumbruken tilsvarande 120 husstandar

– Me bruker mykje straum i produksjonen, men me bruker også mykje straum til prosessane rundt sjølve produksjonen. Der ser me eit stort potensial til å spare mykje.

Det seier administrerande direktør Ole Harald Mykland på Hydro Vigelands brug i Vennesla i Agder.

På fabrikken smeltar dei metall for å produsere aluminium. Det krev mykje energi, men no skal bruken ned.

Smart lyssystem

Innan utgangen av mars skal fabrikken vere i gang med prosessen med å få ned energiforbruket.

Kutta vil svara til 120 husstandars årlege straumbruk.

Halvparten skal gjerast med ei oppgradering av det gamle lysanlegget.

Det heile skal gjerast ved å bytte til ledlys og ta i bruk eit nytt, smart styringssystem som styrer kor det trengst lys til ei kvar tid.

Fabrikken har inngått ein partnarskapsavtale med Hydro rein, som tilbyr fornybare energiløysingar for ein meir berekraftig industri.

Med det nye systemet blir det mogleg for fabrikken å måle enkelttiltak og vite om dei har energisparande effekt.

Totalt sett ser dei føre seg at dei kan spare 2 GWh i året.

Eit klart miljøfokus

Norsk Hydro har ein ambisjon om å bli utsleppsfrie innan 2050.

– Det å redusere energiforbruket er med på å spare miljøet i framtida. Det er heilt klart ein av dei viktigaste faktorane, seier administrerande direktør Mykland.

Elektro- og vedlikehaldsansvarleg på Vigelands brug Christian Aanensen, seier at dei i heile Hydro har eit stort fokus på å redusere straumforbruk.

– Me har eit energiprogram som me prøver å følgje og leitar heile tida etter gode prosjekt.

Aanensen trur tiltaka dei gjer no er eit godt steg på vegen til ein heilt utsleppsfri bedrift i framtida.

Raffineriet på Vigeland er også nabo til Vigelandfoss kraftverk, som produserer energi ved hjelp av vatnet som renn nedover elva Otra. Derfrå kan dei få ei jamn tilgang på rein og fornybar kraft.

– Alle må gå i seg sjølv

Leiar for organisasjon og samfunn i stiftinga Miljøfyrtårn Linn Aas-Hansen Grøtberg, er glad Hydro tek grep for å få ned straumforbruket.

– Generelt heier Miljøfyrtårn på alle bedrifter som gjer tiltak for å redusere energiforbruk.

Ho viser til NVE sine berekningar på at det finst lønsame moglegheiter for å redusere energiforbruk i fleire næringar.

– Alle må gå i seg sjølv og sjå kor dei kan spare energi og faktisk gjere det.

Ho meiner alle bedrifter er nøydde til å redusere forbruket for å bidra i det grøne skiftet.

– Energi er ein ressurs me ikkje kan sløse med. Me er nøydde til å bruke det, men me må redusere det.