Funksjons­hemma mobiliserte for å få delta på foredrag om diskriminering

– Eg finn meg ikkje i at ein skal halde fram med å invitere til samtalar om funksjonshemma utan å invitere oss inn. Arendalsuka, «det demokratiske dansegolvet», burde vere for alle, men det er det ikkje, seier Ida Hauge Dignes (27).

Ho er aktiv i Noregs Handikapforbunds Ungdom og tilsett i Medvind Assistanse, ein leverandør av BPA.

Dignes fortel at ho allereie i juni gjekk gjennom programmet for Arendalsuka for å sjekke kva arrangement som var tilgjengeleg for rullestolbrukarar og andre funksjonshemma.

At foredraget om mikroaggresjon mot funksjonshemma skulle haldast på båten MS Lofoten fekk henne til å reagere.

Ifølgje fleire er båten nemleg fullstendig utilgjengeleg for rullestolbrukarar.

Det var Handikapnytt som omtalte saka først.

Måtte mobilisere

I juli tok Dignes kontakt med forskingsstiftinga Fafo, som står bak arrangementet.

Dei kunne stadfeste at foredraget skulle haldast på båten, men dei var usikre på om det ville vere tilgjengeleg for rullestolbrukarar.

– Det er bra at Fafo forskar på diskriminering av funksjonshemma. Det er berre så paradoksalt at dei stengjer oss ute når dette skal presenterast.

Tysdag møtte Dignes opp ein time i forkant av arrangementet. Då vart det klart at ho og andre i rullestol ikkje kunne komme om bord.

Dignes oppfatta at det heller ikkje var aktuelt å flytte foredraget. Det fann ho seg ikkje i.

Saman med ein kollega besøkte dei telta til Noregs Handikapforbund på Arendalsuka for å finne andre som kunne vere interessert i arrangementet.

– Vi vart ein haug som marsjerte mot båten.

Dignes anslår at nærare 30 personar samla seg for å stå utanfor MS Lofoten.

Legger seg flat

Med mange frammøtte som ikkje kunne komme på båten, valde arrangøren å flytte foredraget til bryggja.

– Det er hårreisande at vi måtte vere såpass mange for å få endra dette. Samtidig skal dei ha honnør for at dei var sporty og enda med å ta det på bryggja, seier Dignes.

Fafos forskingsleiar Terje Olsen fortel til NRK at dei var i ferd med å flytte arrangementet ut på bryggja allereie før Dignes kom tilbake. Han oppfatta ikkje oppmøtet som ein protest.

– Eg er den første til å beklage at arrangementet vart lagt til båten. Vi skulle ikkje hatt det der, seier han.

Skal betre samarbeidet

Olsen fortel at dei tidlegare har vore i dialog med Handikapforbundet rundt utfordringane som kjem med å halde arrangement på båt, men at det kokte litt vekk under pandemien.

– Det var synd at det vart som det vart. Vi skal finne betre måtar å gjere det på framover, seier Olsen.

Han seier dei no har god dialog med Noregs Handikapforbund for å finne andre løysingar for framtidige arrangement.

Noregs Handikapforbund stadfestar overfor NRK av dei kjem til å ha møte med Fafo om problematikken.

– Vi skjønner at det ikkje er vondt meint, men tankeløyse. Når dette arrangementet skal ta plass på ein båt som ikkje er tilgjengeleg for funksjonshemma, må ein undre seg om dei har tenkt igjennom dette, seier forbundsleiar Tove Linnea Brandvik i Noregs Handikapforbund.