Vogntogførar politimeld etter at han mista over 100 sildetønner

Politiet fekk melding om trafikkuhellet på fylkesvegen mellom Svelgen og Grov like før klokka 18 måndag kveld. Uhellet har skjedd på nordsida av Eikelandstunnelen i eit område med smal veg.

– Vi fekk melding om at eit vogntog på veg frå Svelgen og sørover hadde mista ein del av lasta, seier operasjonsleiar Per Rimmen ved Sogn og Fjordane politidistrikt.

Lasta består av tønner med sild. Klokka 19 opplyser politiet at det skal vere over 100 tønner som har ramla ut. Ingen personar vart skadde i samband med uhellet. Forholdet blir politimeld, opplyser politiet på Twitter.

– Ingen vart trefte

Rimmen seier sidedørene på hengaren har delvis opna seg, slik at sildetønnene har ramla ut.

Dei har spreidd seg utover vegen, men til alt hell var det ingen av bilane som var i nærleiken som vart trefte.

– Føraren av vogntoget blir politimeld, seier Rimmen. Både føraren og vogntoget er utanlandske.

– Stort skadepotensial

– Last som ramlar av køyretøy er alltid alvorleg. Det kan treffe andre trafikantar, og skadepotensialet er absolutt stort, seier operasjonsleiaren.

Ein hjullastar er no på staden for å rydde vegen slik at trafikken kan sleppe forbi. Det er også rekvirert eit firma som skal rydde.

– Dette er ikkje noko som kan dumpast i naturen, seier operasjonsleiaren.

Vegen var ein periode heilt stengd i starten, men det har i periodar blitt sleppt forbi trafikk, får NRK opplyst av politiet. Vegen kjem til å bli stengd utover kvelden og natta i samband med opprydding.