Trudde du Statens vegvesen sine tilsette heldt seg på vegen? Tru om att ...

Det svarar til flyreiser for mellom 2,5 og tre millionar kroner.

– Det er mykje, vedgår regionvegsjef Helge Eidsnes.

Reiser mindre i år

I snitt betyr det at Statens vegvesen har dagleg sju tilsette om bord i eit fly. Eidsnes vedgår at dei har ein veg å gå, og seier at dei arbeider med å bruke meir videokonferansar på møta sine.

– I år har vi redusert reisekostnadene med 15 prosent. Vi har mange videorom, og vi aukar stadig, seier han.

– Ser du paradokset med at de som byggjer veg, er så mykje oppe i lufta?

– Eg ser koplinga, men så skal det også seiast at vi sjølve reiser veldig mykje og køyrer mykje bil.

Mest til byane

Første halvår i år er det, ikkje uventa, Oslo (516), Bergen (382) og Stavanger (220) som er dei mest hyppige av 18 destinasjonar for tilsette i Vegvesenet.

Det er i Oslo Vegdirektoratet har sin base, medan region Vest sine største avdelingskontor er i Bergen og Stavanger.

Regionvegkontoret med sine 191 tilsette ligg i Leikanger, 40 minuttar køyreavstand frå Haukåsen.

– Men det skal seiast at vi brukar svært mykje videomøte, seier Eidsnes.

Sparte ei heil stilling

Like ved regionkontoret til Statens vegvesen, ligg kontoret til nokon som har sett fokus på nettopp dette med å bruke meir tid på bakken – og mindre tid i lufta.

Gjennom eit prosjekt sparte Fylkesmannen i Sogn og Fjordane pengar tilsvarande ei stilling på videomøte.

– Vi klarte nesten å erstatte 200 møter, utover dei som vi tidlegare køyrde på video, seier fylkesmann Anne Karin Hamre.

– Sett dykk høge mål

Ho har eitt enkelt råd til Statens vegvesen: Sett dykk nokre hårete mål!

– Ja, eg trur det kan vere lurt å organisere dette som eit prosjekt og å setje seg høge mål, seier ho.

– Når det er sagt, så trur eg etatane her i distriktet er flinke til å bruke videomøte. Eg trur potensialet for å spare er endå større hos departement og direktorat, som er vande med at folk kjem til dei i Oslo, avsluttar ho.