Steinar Tenden kan vere på veg tilbake til klubben han scora 88 mål for på 81 kampar frå 2000 til 2002.
Det stadfestar spelaren sjølv.
– Det kan hende at eg tar ein sesong i Stryn. Men eg ønskjer ikkje å seie så mykje om dette no. Om ikkje kan det bli aktuelt å legge opp, seier Tenden.
Vil gjerne ha Tenden på laget
Trenar i Stryn, Dagmund Evebø, har hatt fleire samtalar med Tenden om framtidig spel i 3. divisjon den siste tida.
– Vi har hatt kontakt med han fordi han har søkt på jobbar i Stryn. Tenden har signalisert at han etter kvart tenker å flytte heim att. Om han skulle flytte tilbake, vil ein overgang vere aktuelt for oss, seier Evebø.
Er i dialog også med Førde
Evebø meiner Tenden kan videreføre erfaring frå høgare nivå til Stryn sine unge spelarar ved ein eventuell overgang.
– Han veit kva som skal jobbast med for å bli god, seier Evebø.
Tenden har bak seg ei karriere med opphald i klubbar som Brann og Sogndal.
Han skal og vere i dialog med Førde om ein ny sesong i 2. divisjon.