Sol i dag, og finare skal det bli!

– Det er ein strålande fin dag i dag, og det vil halde seg fint utover dagen, seier vakthavande meteorolog Berit Hagen.

Frå ullstillongs til shorts

Det har vore lenge mellom godversdagane i Sogn og Fjordane denne sommaren. Mange har enno ikkje teke av seg ullstillongsen frå den kalde våren, men no kan den bytast ut med lettare klede. For no ser det ut til at også Sogn og Fjordane får smake på sommaren.

– Frå tidleg tysdag morgon og resten av neste veke vert det skikkeleg sommarvêr. Då kan temperaturen komme opp i 25 grader, og det vil halde seg stabilt fint lenge, seier Hagen.

Søndag vil det skye til over fylket, og det vil kome ettermiddagsbyer. Desse vil halde seg over fjordfylket også måndag.

Fint vêr ei veke

– Då vil nok temperaturane gå litt ned og det blir truleg 15 grader dei fleste stadane.

Hagen kikkar på kartet ho har framføre seg og forklarer at det ligg eit svakt nedbørsområde på grensa frå Hordaland.

– Det er kanskje nokre skyer på grunn av dette lengst sør i fylket i dag, men stort sett skal sola skine frå skyfri himmel i dag.

Korleis neste helg blir, torer ikkje Hagen å seie bestemt. Men det ser lovande ut.

– Det er vanskeleg å seie så langt fram i tid, men prognosane vi ser på no er gode.