Normal

Samlar inn pengar etter dødsulukke

Innbyggjarane i Lavik opnar lommebøkene for dei polske familiane etter dødsulukka ved Havyard Leirvik. I dag starta ein spontan innsamlingsaksjon.

Innsamlingsaksjon i Lavik
Foto: Cosmin Cosma/NRK

Tone Sissel Nyland
Foto: Cosmin Cosma/NRK

To polske verftsarbeidarar omkom og ein tredje ligg framleis kritisk skadd etter ulukka sist måndag.

Tone Sissel Nyland  driv blomsterbutikk i Lavik. Men i dag har ho ikkje hatt tid til å selje blomar. I staden organiserer ho ein innsamlingsaksjon. Dødsulukka ved Havyard Leirvik eit par mil unna har gjort sterkt inntrykk.

- Vi ser dei på butikken og bensinstasjonen, og er vane med å ha dei i nærområdet. Dette er vår måte å vise omtanke for dei, og syne at vi bryr oss om dei, seier Nyland. 

Vil hjelpe familiane 

Bøssene vart i dag plasserte på butikkar, hotellet og bensinstasjonen. I tillegg vil næringslivet sjølv leggje pengar i bøssa. Fredag ettermiddag og laurdag går Røde Kors meir aktivt til verks ved å gå rundt med bøsser mellom anna i ferjekøen. Leiar Bjarne Hellebø i Røde Kors seier det er heilt naturleg å stille opp.

- Vi plar vere med på aksjonar for å hjelpe lidande. I dette tilfellet har det skjedd i nærmiljøet. Vi har hatt buande folk frå Polen i området, og det var naturleg å støtte opp, seier Hellebø. 

Trur på mykje pengar

Innsamlinga skal pågå til ut i neste veke. Då tar verftsdirektøren ved Havyard Leirvik pengane med til Polen i samband med gravferda til dei to omkomne. Alle pengane skal gå til desse to familiane, pluss familien til han som framleis er kritisk skadd.

- Eg håpar det vert mykje pengar og at folk vil gje ein del, slik at det vert lettare i kvardagen for familiane som er råka av ulukka. Det var vel dei som var ute og tente pengar som no er vekke eller vert arbeidsufør, seier Tone Sissel Nyland.

Vegopning på Bergum i Førde kommune