– Eg såg på MGPjr i går kveld, og eg tykkjer det er flott at nokon endeleg syng om Vestlandet, seier Abraham Raftevold Haugen.
11-åringen frå Eid er ikkje den einaste som likte songen til Vilde Hjelle (13) og Anna Naustdal (12) .
– Eg likar at dei syng om Vestlandet og alle dei som bur her, seier Abraham. Han er stolt over at to av jentene som går på same skule som i går kveld gjekk av med sigeren i MGPjr.
Åtte år gamle Kanutte Raftevold Haugen tykkjer det er spanande å ha ei songstjerne på skulen der ho går.
– Når dei kjem heim, så skal eg fortelje at eg såg på finalen. Mamma stemte masse i går, sikkert for 40 pengar seier Kanutte.
Seks år gamle Thomas Denton gler seg til å kunne gratulere dei to songstjernene når det kjem heim.
– Eg likte best songen om Vestlandet, fordi den var fin, seier Thomas.
Måndag skal vinnarane feirast i operahuset på Nordfjordeid.
– Vi inviterer til ope hus i Operahuset Nordfjord klokka 18 måndag ettermiddag for å feire Anna og Vilde. Det er nærast eit folkekrav frå alle i Eid no, seier ordførar i Eid Alfred Bjørlo.