– Vi har gått mann av huse for å heie på jentene, seier ordførar i Eid kommune, Alfred Bjørlo.
Saman med Bjørlo har ein fanskare på 350 familie, vener og kjente teke turen frå Vestlandet til Oslo denne helga. I kveld skal dei heie på dei lokale stjernene som har kome til den store MGPjr-finalen.
– Eg er her både som privatperson og ordførar i dag. Det er sjølvsagt stas å få gå med ordførarkjeda for å vise støtta mi, seier han.
For å samle den lokale fansen har dei vaksne oppretta ei lukka Facebook-gruppe for alle som hadde lyst å følge jentene til Oslo denne helga.
– Vi organiserte alt i ei lukka gruppe slik at vi kunne halde orden på alle desse fantastiske personane som ynskjer å vise si støtte. Det skulle berre mangle at vi reiste hit for vi er vanvittig stolte av jentene våre, fortel Bjørlo.
Ungdomsbandet Indigo Child spelar i pausen i kveld og ordføraren er stolt av ungdommen i kommunen.
– At både pausenummeret og ein av finalistane er frå Eid er heilt fantastisk. Det viser kor mykje talent som finnast i musikk- og kulturmiljøet vårt, seier han og viser fram t-skjorta med bilete av jentene på.
- Les meir her:
T-skjorter og hjarteplakatar
Magni Hjertenes Flyum har stått i bresjen for å bestille t-skjorter til alle som vil ha. På kveldstid har ho og ein gjeng ivrige tilhengjarar klipt ut hjarter med teksten VILDE OG ANNA på.
– Vi er enormt stolte av dei og det vil vi vise gjennom desse effektane vi har laga, seier Flyum.
Ho gler seg til å oppleve stemninga i Spektrum.
– Vi har fått eigen plass i salen og vi skal heie høgst av alle, seier ho.
Allereie førebilete
Både born, ungdom og vaksne har teke turen til hovudstaden og Ida Vingen Vedeld trur Vilde og Anna allereie har blitt førebilete for unge i lokalmiljøet.
– Det er utruleg at dei skal synge på ei så stor scene. Eg trur mange ser opp til dei fordi dei har kome så langt som dei har, smiler Vedeld.
Ho har teke turen i lag med foreldre, syskjen og gode vener. Ho synest det er spennande å sjå så mange frå heimstaden i Oslo.
– Uansett kor eg snur meg så ser eg nokon frå Eid, det er heilt rart!
Ho oppfordrar alle til å ta opp mobilen og stemme på Vilde og Anna i kveld.
– Eg skal stemme til eg ikkje har meir pengar igjen på telefonen, avsluttar ho.