Radiokokk Steinar Lindstrøm serverer både sylterull og lammerull til jul. Steinar brukar karve i sin lammerull, men i dag skal du få dei klassiske oppskriftene.
Steinar sin sylterull
- Tynnside av gris
- 1 ss salt
- 1,5 ts. malt pepar
- 1/2 ts. malt allehande
- 1 ts. malt nellik
- 1 ts. gelatinpulver
- Saltlake: 3 liter vatn og 300 gram salt.
Slik gjer du det
Lag ferdig krydderblandinga og del tynnribba i to på langs. Ha krydder mellom laga og rull kjøtet i hop. Sy rullen saman med ein bommulstråd. Kok opp salt og vatn og avkjøl laken.
Legg sylterullen i saltlake i 3 døgn på ein kald plass, før du kokar rullen i to timar. Sylterullen skal ikkje fosskoke, berre trekke opp mot kokepunktet.
Legg rullen i press over natta. Sylterullen er klar til servering.
Steinar sin lammerull
- Slagside av lam
- 1 ss salt
- 1/2 ts. pepar
- 1 ts. gelatinpulver
Slik gjer du det
Når du skal lage lammerull er det viktig at du skjer vekk seige hinner og overflødig feitt frå slagsida. Gni krydderblandinga inn i kjøtet og rull i hop slagsida. Her må du og fram med nål og tråd for å få lammerullen skikkeleg i hop.
Legg lammerullen i saltlake i 3 døgn, sjå oppskrift ovanfor, og lat rullen trekke i to timar. Vatnet skal ikkje fosskoke. Lammerullen må også leggast under press over natta.