– Usikker identitet, politi er på staden og det er beslutta obduksjon, melder politiet på Twitter klokka 19.21.
– Vi har innstilt søket i Årdal, og vi går utfrå at personen som er funnen død er den same som vi har leita etter, og det er heller ingen andre sakna i området, seier operasjonsleiar Inge Verøy til NRK.
Leita langs land
Leitemannskap har i ettermiddag gått strandsøk langs Årdalsfjorden i leitinga etter den 75 år gamle mannen som blei meld sakna måndag.
– Det er mannskap i to båtar i søk ute på fjorden, og det er også tre lag med mannskap som gjennomfører strandsøk, sa Verøy tidlegare i ettermiddag.
Ein ekvipasje frå Norske redningshunder har også vore med i leitinga.
Fann bilen i sentrum
Mannen blei meld sakna måndag og politiet gjekk først ut med ei etterlysning av mannen sin Toyota Corolla.
– Bilen vart lokalisert av tilfeldig forbipasserande. Den stod parkert på Årdalstangen, sa operasjonsleiar Olaug Holme til NRK tidlegare i dag.
Ber om tips
Det var familiemedlemer som varsla politiet om at mannen kunne vere sakna, etter at dei ikkje hadde klart å få kontakt med mannen på fleire dagar. Kva som kan ha skjedd med den sakna er heilt uvisst.
Politiet vil gjerne ha tips frå publikum i samband med forsvinningssaka, og ber folk ta kontakt på telefon 02800.