På 450 meter over havet har dei rigga seg til i Kleivane rett ovanfor Fjellbygda i Gloppen. I heile dag har gjengen frå Nordfjord Folkehøgskule jobba med å lage leir.
Med seks lavvoar, 35 fjelltelt, to igloar og to store snøklokker skulle det vere rikeleg med plass til friluftsglade nordfjordingar.
– Vi har laga mykje sitjeplassar der det er mogleg å lage bål ute. Så det er lagt godt til rette for å få ein triveleg kveld, seier lærar Per Momrak.
Han håpar det vert opphaldsvêr nokre timar denne natta. Han tippar det vert rundt 50 som tek turen for å prøve seg på ei natt ute. I tillegg er 150 personar frå folkehøgskulen på plass.
(Artikkelen held fram under biletet)
Vêret er inga hindring
For elevane på Nordfjord Folkehøgskule så er ikkje dette første gong dei søv ute. Vi møter dei litt seinare på kvelden.
– Nei, dette har vi gjort ein del. Vêret er inga hindring, seier Malene Gagnat.
– Men dette er første skikkelege vinternatta vår. Det var jo meldt regn, men vi håpte det skulle kome meir som snø. Til no har det vore ei fin blanding. Så vi var førebudde på at vi kunne bli blaute, seier Johan Eggebø frå Finnøy i Rogaland.
Han hadde ikkje trudd det skulle kome så mykje folk som til slutt kom.
– Vi måtte nettopp flytte frå teltet, så det lovar godt, ler han.
På programmet denne kvelden og natta er bålbrenning, i tillegg til diverse skileik.
(Artikkelen held fram under biletet)
Her får vi sove gratis
Ein gjeng 10-åringar frå Sandane skule er godt i gong med å grave i snøen. Og dei har sove ute før kan dei fortelje.
– På Norway-Cup ein gong sov vi i telt, seier ei.
– Eg har sove ute om vinteren før, det gjekk bra, men det kom tore og lyn, og det var kaldt.
I dag har dei teke godt med varme klede på seg og er klare for å ei vinternatt ute.
– Eg trur det blir veldig moro. Vi skal laga snøhole.
– Kven var det som fann på at de skulle sove ute då?
– Det var foreldra våre.
– Dei på folkehøgskulen har laga det fint til for oss med igloar. Her får vi sove heilt gratis. No skal vi prøve å lage ein heilt sjølv, fortel dei.