– Vi står ovanfor ei kjempeutfordring. Det kjem til å bli stor mangel på helsearbeidarar.
Det seier Per Jørgen Loen, assisterande fylkesdirektør, som har ansvar for opplæringsavdelinga i Fylkeskommunen.
Stor sjukepleiarmangel
I førre veke kunne NRK fortelje at det er stor mangel på sjukepleiarar i fylket, og at Askvoll kommune lokkar med stipend som eit desperat forsøk på å få sjukepleiarar til kommunen.
Men det er også mangel på faglærde helsearbeidarar, og det vil bli endå færre av dei dersom dagens trend blir vedvarande.
– Det er mellom 15 og 20 ledige lærlingplassar. Så det er nesten dobbelt så mange plassar som det var søkjarar i haust, seier Loen.
30 ledige skuleplassar
For å bli helsefagarbeidar, tidlegare hjelpepleiar, må ein gå to år på helse- og sosialfag på vidaregåande. For å kunne gå opp til fagprøva må ein etter det går to år i lære.
Det er ikkje berre mangel på lærlingar - det er også nesten 30 ledige skuleplassar i fylket.
– Det ser dårleg ut. Det er 90 skuleplassar, men berre 64 av desse er fylte, seier Loen.
Vel påbygging
Loen fortel at mange vel å gå vidare på allmennfagleg påbygging etter dei to åra på skulen, i staden for å bli lærling og ta fagbrev.
– Det er mange som vel gå vidare på påbygging for å få studiekompetanse sånn at dei kan gå vidare på høgare utdanning. Det er positivt, men det er likevel eit skrikande behov etter fagarbeidarar, seier Loen.