Daate lea naaken dejstie vihkielommes heannadimmijste NRK Sápmin histovrijesne.
Åenehks vihkeles jaepiej bïjre:
■ 1946: Gålkoen 8.b. NRK staeries raadijovesaadtegh eelki. 20 min. ikth våhkoen.
■ 1947: Gålkoen 20.b. YLE staeries raadijovesaadtegh eelki. 15 min. ikth våhkoen.
■ 1948: Goeven 1.b. NRK dam voestes saemien programmetjaelijem staeries barkosne seehti.
Programmetjaelije barkoem eelki voerhtjen 1949.
■ 1949: Dorjemasse saemien saadtegijstie sirtesovvi Vadsøse.
■ 1964: Dorjemasse saemien saadtegijstie bååstede sirtesovvi Tromsøse.
■ 1965: Goevten 19.b. SR staeries saemien raadijovesaadtegh eelki, 5 min fïerhten biejjien.
■ 1973: Rïhkeden NRK åarjelsaemien saadtegigujmie eelki. NRK Trööndelage dïedtem utni saadtegi åvteste.
■ 1975: Tsïengelen NRK jïh SR julevsaemien saadtegh ektesne eelki. NRKse lij NRK Nordlaante mij dïedtem utni
saadtegi åvteste dellie.
■ 1976: Gålkoen 4.b. dorjemasse saemien saadtegijstie Karasjohkese sirtesovvi.
■ 1976: Gietskies kontovre Tromsøsne tseegkesovvi eevre mænngan åejvieredaksjovne sirtesovvi Karasjohkese.
■ 1979: NRK Sámi Radio gietskies kontovrem Vadsøsne åadtjoeji.
■ 1982: Ruffien 1.b. NRK Sami Radio gietskies kontovrem Guovdageaidnusne åadtjoeji.
■ 1984: Snjaltjen NRK Sámi Radio sov jïjtse kringkastingegåetiem åadtjoeji Karasjohkesne.
■ 1988: Goevten NRK Sámi Radio gietskies kontovrem Oslosne tseegki.
■ 1989: Mïetsken NRK Sámi Radio sov gietskies kontovrem Vadsøsne Tanan gåajkoe serti.
■ 1990: Goevten 20.b. NRK staeries saemien maajhvååjneseprogrammh eelki.
■ 1991: Goevten 7.b. NRK staeries saemien maanaprogrammh maajhvååjnesisnie eelki.
■ 1992: Mïetsken 25.b. NRK Sámi Radio akte jïjtse goevtese NRKsne sjïdti.
■ 1993: NRK Sámi Radio aktem åarjelsaemien gietskies kontovrem tseegki. Voestegh kontovrem bïeji NRK
Noerhte-Trööndelagen kontovrese Stientjesne.
■ 1993: Rïhkeden 3.b. NRK Sámi Radio staeries åarjelsaemien saadtegh rijhkenedtesne eelki.
■ 1996: Ruffien NRK Sámi Radio gietskies kontovrem Kåfjordesne tseegki.
■ 1996: Mïetsken NRK Sámi Radio gietskies kontovrem Divtasvuotnesne tseegki.
■ 1996: Dïhte åarjelsaemien gietskies kontovre Stientjeste sirtesåvva Snåasese, mij lea åarjelsaemien dajven
jarngesne.
■ 1997: Goeven NRK Sámi Radio gietskies kontovrem Skånlandesne tseegki.
■ 1999: Goeven saemieraadijovh aktem tjåenghkies nedteplaeriem tseegkin, www.samiradio.org
■ 1999: Ruffien NRK Sámi Radio eelki sov saadtegh seedtedh aaj digitaale nedtesne.
■ 2000: Voerhtjen ektiesaemien saerniesaadtegh raadijovisnie vihth tseegkesovvin.
■ 2001: Mïetsken 20.b. NRK jïh SVT biejjieladtje saerniesaadtegh maajhvååjnesisnie eelkin (Ođđasat). Berit
Nystad lij saerniestæjja dennie voestes saadtegisnie. YLE meatan sjïdti laavenjostosne tsïengelen 2002.
■ 2003: NRK Sámi Radio. aktem aalkoealmetjeredaksjovnem tseegki juktie gyhtjelassh aalkoealmetji bïjre
buerebelaakan gïetedidh jïjtse saadteginie, jïh NRKen jeatjah programmefaalenassesne.
■ 2003: Dïhte gietskies kontovre Guovdageaidnusne mahte guektiengïerth dan stoerre sjïdti jïh sagke buerebe
nuepieh åadtjoeji maajhvååjneseprogrammh darjodh.
■ 2003: NRK Sámi Radio laavenjostoem eelki jeatjah aalkoealmetjekringkasterigujmie juktie dïenesjem
aalkoealmetjegyhtjelassijste nænnoestehtedh jïjtse saadteginie jïh NRKen jeatjah
programmefaalenassesne.
■ 2003: Goeven 28.b. Kola Sámi Radio Russlaantesne staeries raadijovesaadtegh eelki. Dah saadtegh 15
minudth ryöhkin jïh lin ikth våhkoen.
■ 2005: NRK dam saemien maanafaalenassem lissiehti maajhvååjnesisnie (Manaid-TV) göökte saadtegidie
våhkoen.
■ 2007: YLE, SVT, SR jïh NRK tjåenghkies ulmieh jïh strategijh nænnoestin dan ektienoerhtelaanti laavenjostose.
■ 2007: NRK Sámi Radio sov nedtefaalenassem sertiesti nrk.no’en nualan, jïh nedtem åejviesijjine veelji
saernieorrestimmide.
■ 2007: NRK Sámi Radio barkoedåehkiem julev- jïh åarjelsaemien dajvesne lissiehti, gosse journalisth sertin
åejvieredaksjovneste Divtasvuotnese jïh Snåasese.
■ 2008: NRK Sámi Radio lij meatan gosse aktem veartenevijries viermiem tseegki aalkoealmetjekringkasteridie,
World Indigenous Television Broadcasters Network (WITBN).
■ 2009: NRK Sámi Radio dam saemien maanafaalenassem lissiehti maajhvååjnesisnie (Manaid-TV) golme
saadtegidie våhkoen.
■ 2011: Tsïengelen 1b. NRK Sámi Radio nommem jarkeli jïh nommem NRK Sápmi åadtjoeji, juktie buerebelaakan
vuesiehtidh NRKen saemien goevtese ij ajve raadijovem darjoeh.
■ 2012: NRK Sápmi dam saemien maanafaalenassem Mánáid TV lissiehti njieljie saadtegidie våhkoen.
■ 2013: Mïetsken 19.b. NRK Sápmi aktine iehkedslåhkojne Ođđasat’ste eelki. Johan Ante Utsi lij saerniestæjja
dennie voestes saadtegisnie.
Åenehks NRK Sápmin histovrijen bïjre:
1946 åvtelen
Jåvleiehkeden 1936 akte saemien gyrhkesjimmie Polmaken gærhkosne bæjjese vaaltasovvi baantese. Daate lij voestes aejkien saemien gïele seedtesovvi raadijovisnie. Dan mænngan dle lohkijh stuhtjh tjeelin plaerine gusnie vaajtelin jienebh saemien raadijovesaadtegh åadtjodh. Lars Jonsen Gaup (1887-1973) Karasjohkeste aaj viehkiem åadtjoeji lientsien gagkestæjjeste prieviem tjaeledh Norsk rikskringkastingen gåajkoe Oslosne, gusnie saemien raadijovesaadtegi bïjre meedti.
Dah voestes jaepieh staeries saemien saadtegigujmie 1946-55
Gålkoen 8.b. raejeste Sara K. Hætta (r.1925) Guovdageaidnuste dah voestes saemien raadijovesaadtegh darjoeji. Seedtemesijjie lij Tromsø. Ellen Øvergård (1889-1954) Guovdageaidnuste dejtie saemien raadijovesaadtegidie darjoeji njoktjen minngiegietjien raejeste 1947.
Gïjredaelvien 1948 Kathrine Johnsen (r.1917) Vestertaneste meatanbarkijinie sjïdti dejtie saemien saadtegidie. Seamma tïjjen Edel Hætta Eriksen (r.1921) Guovdageaidnuste aaj eelki viehkiehtidh dejtie saemien raadijovesaadtegidie darjodh. Gåabpatjahkh lohkehtæjjaskuvlesne Tromsøsne veedtsigan jïh dejtie saemien saadtegidie bielietïjjen darjoejigan.
Jaepien 1949 Thor Frette (1918-87) programmetjaeliejinie jïh åvtehkinie eelki NRKen Vadsø-kontovrese. Dïhte aaj dïedtem åadtjoeji dej saemien raadijovesaadtegi åvteste, mah sirtesovvi Tromsøste Vadsøse. Jïjtje tuhtji dah saemien saadtegh lin hijven, men Finnmark Tidende’n redaktööre jïh lïhtsege Kringkastingeraeresne, Richardh Rasmussen idtji dam tuhtjh. Rasmussen lij jïjtje saemien lohkeme, men gæmhpoeji dan tïjjen daaroedehtemepolithken åvteste saemijste. Aktene prievesne dan voestes Kringkastingeåvtehkasse NRKsne, Kaare Fostervoll, goeven 3.biejjeste 1949, gaskem jeatjah daam tjeeli:
(Jarkoestamme) " Dej gaskem mah leah daaroedehtemebarkojne barkeme Finnmaarhkesne, dle naaken plonterdeminie diekie lea faamoeh båateme mah sijhtieh dam barkoem måakoedidh eevre daelie gosse edtja dam minngemes jïh vihkeles lutnjemem darjodh. (….) Gosse lea dej saemien saadtegi bïjre Kringkastingesne (dah nöörjen årrojh vienhtieh) Kringkastinge joe aktem dan stoerre jïh hijven barkoem dorjeme daaroedehtemen gaavhtan, ihke akte tjöödtjestimmie daesnie manne åtnam goh akte sïlle bååstede. (…) saernieh saemiengïelesne jallh jeatjah saemien saadtegh goh religijööse saadtegh, im manne tuhtjh daerpies".
Jaepieh vuestievæljojne: 1956-65
Trygve Madsen (r.1927 Guovdageaidnusne) lij programmetjaelije Vadsøsne 1956-58. Dïhte gaskem jeatjah dam voestes lidteræære lohkemeseerijem dejnie saemien saadteginie darjoeji (1958). Jaepien 1959 Kathrine Johnsen (1917-2002), Vestertaneste, staeries programmetjaeliejinie eelki. Dïhte tjiehpieslaakan saemien raadijovesaadtegigujmie barki gellie luhkiejaepieh. Jïjnjh dejstie jaepijste lij oktegh, jïh dan åvteste earoenommem «Saemieraadijoven tjidtjie» åadtjoeji. Dïhte dovne vuestievæljoem, dïedtesimmiem jïh somperevoetem sov barkoen vööste dååjri, jïh altese bijjieåvtehkh idtjin gåessie gænnah naan håhkoem vedtieh saemien gïele sïjhti guhkiebasse jieledh jïh evtiesovvedh.
Jaepien 1960 akte tjåanghkoe NRKsne öörnesovvi dej saemien saadtegi bïjre. Dovne Kathrine Johnsen, seedtemen åvtehke Arthur Klæbo jïh Kringkastingeåvtehke Kaare Fostervoll lin stïeresne. Tjåanghkoen aamhtese lij dah saemien saadtedh jïh saemien gïele. Akte åavroes digkiedimmie sjïdti. Daennie tjåanghkosne Kringkastingeåvtehke jeehti «vïjhtine jaepine saemien gïele sæjhta nåhkelidh, jïh luhkine jaepine eevre gaarvanamme». Daah baakoeh Katrinem aarmoedi, jïh dïhte Fostervollese jeehti "ajve akte statue mij ij maehtieh sov mïelem jarkelidh". Dan mænngan jeehti dam mij mænngan gåvlehke baakoeh sjïdti:
(Jarkoestamme) "Arthur Klæbo edtja jaemedh akten biejjien, men ij leah saaht ovvihkeles Klæbose mejtie manne dam garhkehtem mearan daennie stovlesne tjahkesje, jallh Klæboe åådtje jieledh goske iemielaakan jaama. Naemhtie aaj dejnie saemien gieline. Ij leah saaht ovvihkeles mejtie mijjieh dam slaavvobe, ov -goh dïhte lij akte ovdaerpies leavloe, jallh mejtie gïele åådtje jieledh goske iemielaakan jaama. "
Tjaktjen 1964 dorjemasse dejstie saemien raadijovesaadtegijstie vihth Tromsøse sirtesovvi, mænngan Vadsøsne orreme 1949 raejeste. 1965 raejeste saemien saernieh Tromsøste aaj noerhtesveerjen saemiedajvine seedtesovvin fïerhten aereden tsåahka 0800-0805. Tjaktjen 1966 raejeste saadtegh aaj seedtesovvin dejnie noerhtemes dajvine såevmien bielesne. Naemhtie dïhte noerhtelaanti-saemien raadijovelaavenjoste eelki.
Jaepieh baahkebe bïegkigujmie 1966-75
1966 raejeste seedtemetïjje saemien raadijovesaadtegidie læssani. Vielie goh 1,5 tæjmoeh seedtemetïjje lij jïjnje dan aejkien, jïh gosse seedtemetïjje vielie læssani dej minngebi jaepiej, dellie vööjni saemien gïele raaktan eelki dovne sijjiem jïh dåarjoem åadtjodh Norsk Rikskringkastingesne. Men annje gellie jaepieh veesin åvtelen barkoedåehkie stuerebe sjïdti.
Jalhts göökte stoerre salkehtimmieh sijhtien aktem ektienoerhtelaanti saemien raadijove- jïh TV-jarngen tseegkedh juktie saemien raadijove- jïh TV-saadtegh darjodh, dle idtji naemhtie sjïdti.
Jaepien 1971 Andreas Njarga (f.1939) Polmak’este programmetjaeliejinie eelki dejtie saemien saadtegidie. Dellie vihth göökte programmetjaelijh, men barkoeleavloe lij læssanamme.
Jaepien 1974 dan åvteste akte gåalmede programmetjaelije tseegkesovvi dejtie saemien saadtegidie. John Trygve Solbakk (r.1945) Båteng’este Tanesne dam barkoem åadtjoeji.
NRK dej åarjelsaemien saadtegigujmie eelki 1973. Dah saadtegh lin luhkie minudth fïerhten njealjeden våhkoen, jïh dej voestes gaektsie jaepiej Anna Joma Granefjell Rööroste dejtie programmide darjoeji.
Tsïengelen 1975 NRK eelki dejtie voestes julevsaemien saadtegidie seedtedh. Dah saadtegh lin vïjhte minudth våhkoen, jïh seedtesovvin Bådåddjoste jïh Luleåeste. Kåre (Urheim) Tjihkkom jïh Inger Kuoljok saadtegidie Johkemehkeste darjoejigan.
Jaepieh juhtemen mænngan: 1976-85
Gålkoen 4.b. dïhte voestes saemien raadijovesaadtege seedtesovvi Karasjohkeste. Mænngan goh «ålkoelisnie» orreme gellie luhkiejaepieh, dle raadijovebarkoe saahtah akten jielije saemien byjresasse bööti. NRK Sámi Radio mænngan dajvekontovrestatusem åadtjoeji NRKen sisnjelen.
Golme nyjsenæjjah mah programmetjaeliejinie sjïdtin, NRK Sámi Radion voestes gåetien ålkolen Karasjohkesne: Inga Juuso, Kathrine Johnsen jïh Kirsten Isaksen.
Kringkastingegåetie tseegkesåvva
Jaepien 1984 NRK Sámi Radio aktem jïjtse kringkastingegåetiem åadtjoeji Stálloláttusne Karasjohkesne.
Jaepien 1985 Nils Johan Heatta (r.1954) Guovdageaidnusne saemieraadijoven åvtehkinie eelki. Dïhte lij barkeme goh programmeingeniööre Karasjohkesne jïh Kirunesne, jïh mænngan goh programmetjaelije Karasjohkesne dan åvtelen. Nils Johan Heatta lea annje NRK Sámi Radion åvtehke jaepien 2013.
TV- barkoe aalka: 1986-95
Kathrine Johnsen lij programmetjaelije jïh boelhkine aaj åvtehke, eevre 1987 raajan, gosse 70 jaepieh illi. Sov barkoen åvteste saemien raadijovesaadtegigujmie, dïhte Gånkan earoemedaljem gulleste åådtjeme jïh aaj Saemieraerien earoebaalhka.
ČSV lij dïhte nomme dejtie staeries saemien maajhvååjneseprogrammide mejtie NRK Sámi Radio eelki 1990. Jaepien mænngan dle staeries saemien maanaprogrammigujmie eelki maajhvååjnesisnie. Aalkovisnie akte faalenasse ikth asken, men daelie akte faalenasse fïerhten våhkoen. NRK Sámi Radio akte jïjtse programmegoevtese sjïdti Norsk Rikskringkastingesne jaepien 1992, jïh dellie aktem jeatjah staatusem jïh sijjiem NRKsne åadtjoeji, goh aarebi.
Jaepien 1993 NRK Sámi Radio staeries åarjelsaemien raadijovesaadtegh rïjhkenedtesne eelki. Dah saadtegh dorjesovvin dennie åarjelsaemien gietskies kontovresne mij tseegkesovvi 1993, jïh mij 1996 raejeste lea Snåasesne orreme. Sigbritt ”Pia” Persson dïedtem utni dej åarjelsaemien raadijovesaadtegi åvteste goske orriji NRKsne jaepien 2002.
Einar Førde (r. 1943) kringkastingeåvtehkinie eelki Norsk rikskringkastingesne jaepien 1989. Dan tïjjen gosse dïhte lij åvtehke dle NRK Sami Radio sagke stuerebe sjïdti. Dennie noerhtelaanti-saemien laavenjostosne lij aaj akte tsevtsiedæjja.
Saemieraadijoven gåetie mij lij gaervies 1984 mænngan fer onne sjïdti, gosse barkoe læssani 1990-jaepiej. Dan åvteste samieraadijoven gåetie væjrani jaepien 1995 orre tjïehtjeligujmie redaksjovnese jïh raadijovesaadtegidie. Mænngan gåetie ikth vielie væjranamme.
Orre gietskies kontovrh: 1996-2000
Ruffien 1996 kringkastingeåvtehke Einar Førde lij stïeresne rïhpestimmesne dehtie orre gietskies kontovreste Kåfjordesne Noerhte-Tromsesne. Saernieh jïh jeatjah programme-aamhtesh dajveste tjarke læssanin gosse Mona Solbakk eelki goh dïhte voestes meatanbarkijinie kontovresne.
Jaepien 1996 NRK Sápmi dam åarjelsaemien kontovrem Snåasese sirti.
Heevehtimmiejaepien 1996 (NRK Sámi Radion 50-jaepien heevehtimmie) NRK Sámi Radio orre gåetiem åadtjoeji Guovdageaidnusne. Dïhte gietskies kontovre Guovdageaidnusne tseegkesovvi joe 1982, men lij abpe tïjjen orreme Guovdageaidnun Kultuvregåetesne. Dennie orre gåetesne lij sijjie 4 meatanbarkijidie. NRKen kontovre Guovdageaidnusne lea mænngan stuerebe gåetiem åådtjeme.
50 jaepien- heevehtimmie
Gålkoen 1996 lij 20-jaepien heevehtimmie NRK Sámi Radion tseegkemasse Karasjohkesne. Seamma tïjjen lij 50 jaepieh mænngan NRK jaabnan saemien raadijovesaadtegigujmie eelki.
Digitaaleraadijovekanaale
Daelvien 1997 dah noerhtelaanti kringkastingeåvtehkh (generaaledirektöörh) nænnoestin sijjen tjåanghkosne Stuehkesne, akte jïjtse saemien raadijovekanaale edtji tseegkesovvedh dan varke gåarede. Generaaledirektööri nænnoestimmie lij akte vijriesåbpoe barkoe dehtie salkehtimmeste saemieraadijoven åvtehkijstie, maam buakteme jåvli åvteli 1996. Raadijovekanaale edtja tseegkesovvedh gosse digitaale seedtemenedte lea læssanamme jïh åtnose vaalteme. NRK varke sjæjsjali akte dejstie raadijovekanaalijste dennie digitaale nedtesne edtji Sami Radiose årrodh. Dan åvteste NRK Sámi Radio meehti saadtegigujmie aelkedh dennie digitaale nedtesne (DAB) joe ruffien 1999.
Divtasvuotna/Tysfjord jïh Skánit/ Skånland jïjtsh kontovrh åadtjoeh
NRK Sámi Radion gietskies kontovre Divtasvuotnesne åtnose vaaltasovvi mïetsken 1996, men kontovre byjjeslaakan rïhpesti ruffien 1997. Kontovresijjie Arran Julevsaemien Jarngesne Ájluokta/Drag’sne sjïdti, jïh journaliste Sigmund Johnsen dïhte voestes staeries journaliste sjïdti julevsaemien saadtegidie NRK Sámi Radiosne.
Goeven 1997 dïhte gietskies kontovre Åarjel-Tromsese tseegkesovvi. Voestes barkije Skånland-kontovresne ij Sigmund Olsen. Jaepien 2013 kontovre sirtesovvi Harstaden gåajkoe.
Nedteplaerie
Saemieraadijovh aktem tjåenghkies nedteplaeriem tseegkin 1999. Nedteplaerie byjjeslaakan rïhpesti Københavnesne njoktjen, jïh beetnehdåarjoem Noerhtelaanti Ministereraereste åadtjoeji. Nedteplaerie gaskem jeatjah saernieh faalehti saemien, nöörjen, sveerjen jïh såevmien gïelesne. YLE laavenjostoem heejhti jaepien 2002, men SR Sámi Radio jïh NRK Sámi Radio laavenjostoem jåarhkin ånnetji vielie. Mænngan nedteplaeriem orrijin jïh dah saemien kringkasterh sijjeste jïjtsh nedteplaerieh tseegkin. SR Sameradion jïh SVT Sápmi Sveerjesne ektesne eelkin aktem tjåenghkies nedtesijjiem saernide darjodh jaepien 2010.
Ođđasat
Mænngan goh mubpie bigkemedaltese Saemieraadijovegåeteste lij gaervies, dle soejkesjimmiebarkoe eelki aktine orre vijriedimmine juktie sijjiem åadtjodh maajhvååjneseprogrammh darjodh. Dïhte gåalmede bigkemedaltese, daajbaaletje dalhketjigujmie maajhvååjnesasse, lij gaervies tjaktjen 1999 jïh kringkastingeåvtehke Einar Førde meehti dam rïhpestidh suehpeden 2000.
Mænngan soejkesjamme gellie jaepieh, dle saemien saernieh maajhvååjnesisnie seedtesovvin mïetsken 10.b. 2001. Dïhte stööremes jïh vihkielommes heannadimmie saemien meedijehistovresne akte realiteete sjïdti gosse NRK jïh SVT ektesne biejjieladtje maajhvååjnesesaadtegh eelkin, mah seamma tïjjen seedtesovvin abpe Nöörjesne jïh Sveerjesne. Dah saadtegh lin 10 minudth jïh seedtesovvin måantan raejeste bearjadahken raajan. Tsïengelen 2003 saerniesaadtegh væjranin 15 minudtide. YLE meatan sjïdti laavenjostosne akten bieliejaepien aalkoen mænngan, tsïengelen 2002. Dah saadtegh leah mænngan væjranamme 20 minudtide. Mïetsken 19.b 2013 NRK Sápmi aaj iehkedssaadtegem Ođđasat’ste eelki Nöörjesne.
Guovdageaidnu-kontovre væjrene
Tjaktjen 2003 NRK sov gåetiem Guovdageaidnusne væjrani. Dellie sijjie mahte guektiengïerth dan stoerre sjïdti goh aarebi. Væjranimmien mænngan dle sijjie sjïdti 7-8 meatanbarkijidie, jïh daelie gåarede aaj raadijovesaadtegh Guovdageaidnuste seedtedh. Daelie aaj hijven nuepieh sjïdteme maajhvååjnesaernieh jïh jeatjah maajhvååjneseprogrammh darjodh jïh redigeradidh desnie.
Lissiehtamme aalkoealmetjelaavenjostoe
Sámi Radio lij guhkiem soejkesjamme aalkoealmetjegyhtjelassh nænnoestehtedh sov saadteginie. Jaepien 2003 Sámi Radio aktem jïjtse redaksjovnem tseegki mij aamhtesh aalkoealmetji bïjre vielie jaabnan darjoeji, dovne jïjtse saadtegidie jïh NRKen jeatjah saadtegidie. Meatanbarkiji maahtoe aalkoealmetjegyhtjelassi bïjre dan åvteste buerebe sjïdti,i jïh akte viermie tseegkesovvi journalistide, maam mubpieh Sámi Radiosne meehtin nuhtjedh journalistebarkosne.
Jaepien 2008 NRK Sámi Radio lij meatan gosse dam veartenevijries viermiem aalkoealmetjekringkasteridie tseegkin, World Indigenous Television Broadcasters Network (WITBN).
Nommemålsome
Tsïengelen 2011 NRK Sámi Radio nommem jeatjahtehti jïh nommem NRK Sápmi åadtjoeji. Daate dorjesovvi juktie vuesiehtidh NRK Sápmi dovne TV, nedtem jïh raadijovem dorje, jïh ij ajve dam minngemes neebneme. NRK Sápmin raadijovesaadtegh aaj dan mænngan nommem Sámi Radio åadtjoeji, jalhts institusjovne nommem jarkeli. (Daesnie maahtah vielie lohkedh nommemålsomen bïjre: http://www.nrk.no/kanal/nrk_Sápmi/1.7450078)
NRK Sápmin åvtehkh
■ Andreas Njarga (reakadamme 1939) Polmakste lij Saemieraadijoven åvtehke boelhken 1976-79.
■ Hans Eriksen (reakadamme 1937) Polmakste lij Saemieraadijoven åvtehke boelhken 1979-80.
■ Odd Mathis Hætta (reakadamme 1940) Guovdageaidnuste lij Saemieraadijoven åvtehke boelhken 1980-83.
■ Arne Store (reakadamme 1945) Nessebyste lij Saemieraadijoven åvtehke boelhken 1983-85.
■ Nils Johan Heatta (reakadamme 1954) Guovdageaidnuste lij Saemieraadijoven åvtehke boelhken 1986-2015.
■ Mona Solbakk (reakadamme 1971). 2015 ->.