Jalhts NRK Sápmi lea dïhte unnemes NRKen govhte goevtesijstie, dle dïhte dïhte stööremes saemien meedijeektievoete mij gååvnese. Mænngan 1983 NRK Sápmi sov åejviekontovrem åtneme Karasjohkesne (Nöörje).
Akte dejstie njieljie saemien kringkasterijstie
Saemieh leah doh aajnehke aalkoealmetjh Nöörjesne, Sveerjesne jïh Såevmesne. Saemieh aaj akte dejstie aalkoealmetjijstie Kolanjaarkesne Russlaantesne. Dïhte aerpievuekien årromedajve (Saepmie) abpe dam dajvem feerhmie (vuartesjh mïerhkesjimmiem kaarhtesne vuelielisnie).
Dovne Nöörje, Sveerje jïh Såevmie jïjtsh saemien kringkasterh utnieh (NRK Sápmi, SR Sameradion, SVT Sápmi jïh Yle Sápmi), mearan dïhte privaate eekeme saemieraadijove Kolanjaarkesne Russlaantesne lea nåhkelamme. Tjåanghkan dah njieljie saemien meedijeektievoeth Nöörjesne, Sveerjesne jïh Såevmesne abpe dam saemien dajvem (Saepmie) hoksehtieh, jïh jienebh sijjen saadtegijstie ektesne darjoeh. NRK Sápmi lea dïhte stööremes dejstie njieljijste, 110 barkijigujmie (2013). NRK Sápmi 246 tæjmoeh TV seedtie, 1754 tæjmoeh FM-raadijove jïh 6345 tæjmoeh digitaaleraadijovisnie (DAB)/nedteraadijove fïerhten jaepien (2012). Lissine aaj dorjemasse tjaalegijstie jïh guvvijste nedtesne båata.
Åejviebarkoe: Meedijedorjesh saemide darjodh
NRK Sápmin åejviebarkoe lea faalenassem sisveginie darjodh saemien årroejidie, men goevtese edtja aaj daajroem vedtedh jïh bievnedh dan saemien siebriedahken bïjre dejtie jeatjah årroejidie.
NRKen jaepiereektehtsisnie (2012) naemhtie tjåådtje: ”NRK Sápmi saemien sisvegem dorje NRKen ovmessie meedijesijjine. Dïhte saemien goevtese, åejviekontovrine Karasjohkesne, sov uvtemes barkoem åtna sisvegem faalehtidh dejtie saemien årroejidie. Lissine NRK dam saemien kultuvrem våajnoes dorje goh akte bielie dehtie nöörjen gellievoeteste viehkine dokumentareseerijijstie jïh sjïere programmijste”.
«NRK Sami Radio edtja akte ohtjekringkastinge saemide årrodh (aarebi programmeredaktööre NRKsne Reidar Hirsti, NRL Sápmin bïjre NRKen mieriesoejkesjisnie 1983).»
NRK Sápmin ulmie
Jïjtse ulmien bïjre NRK daam jeahta: ”NRK Sápmi edtja sov programmebarkoen tjïrrh viehkiehtidh guktie gaajhkh saemieh maehtieh jïh sijhtieh saemine årrodh, jïh laanten jeatjah årrojh lissiehtamme daajroem saemiej bïjre jïh dan saemien kultuvren jïh siebriedahken bïjre åadtjoeh.”
NRK Sápmin strategijesne aaj tjåådtje: NRK Sápmi edtja akte stuvrije produsente jïh bæjhkoehtæjja årrodh saemiengïelen sisvegistie, dejtie saemien histovrijidie soptsestidh, lïjmine årrodh saemien siebriedahkesne, jïh akte saemien sijjie årrodh saernide, kultuvrese, sjollehtæmman jïh sisvegasse maanide jïh noeride.
Aalkoealmetjelaavenjostoe
2003 raejeste NRK Sápmi lea eadtjohkelaakan barkeme juktie laavenjostoem aalkoealmetjekringkasteri gaskem evtiedidh, juktie veahkam aalkoealmetjesaernijste jïh programmijste lissiehtidh, dovne jïjtse saadteginie jïh NRKen jeatjah programmefaalenassesne.
Jaepien 2008 akte veartenevijries viermie aalkoealmetjekringkasterijstie tseegkesovvi. Dan viermien nomme lea World Indigenous Television Broadcasters Network (WITBN), jïh viermesne 14 lïhtsegh daelie, NRK Sápmine (2013).
2012 raejeste 2014 raajan NRK Sápmin åvtehke, Nils Johan Heatta, lea viermien åvtehke. Viermien tjaelemesijjie lea aaj Taipeieste Taiwanesne jåhteme NRK Sápmin åejviekontovrese Karasjohkesne (Nöörje) daan boelhken. Viermie edtja laavenjostoem programmesjugniedimmien, programmeevtiedimmien jïh programmelåtnomen bïjre evtiedidh. Jaepien 2012 akte teknologeles vuekie tseegkesovvi juktie biejjieladtje programmh juekedh dej 14 lïhtsegi gaskem WITBNsne.
Programmh jïh jeatjah sisvegefaalenassh
Dah byögkeles gïelh NRKsne leah nöörjen jïh saemien. Dah jeanatjommesh NRK Sápmin raadijove- jïh TV-saadtegijstie leah noerhtesaemien gïelesne, men aaj ihkuve saadtegh julev- jïh åarjelsaemien gïelesne. NRK Sápmin ahkedh saerniefaalenasse gaskeviermesne lea dovne nöörjen gïelesne jïh saemien smaaregïeline (mah såemiesmearan aaj dan joekehts guktie dah sjïere gïeline ryöknesuvvieh).
Saernieh
NRK Sápmi syjhtedassine åtna saemiengïelen almetjh prinsihpen mietie byöroeh gaajhkh doh vihkielommes saernieh saemiengïelesne åadtjodh. NRK Sápmin saerniedïenesje edtja vihkeles saernieh åehpiedehtedh. Saerniefaalenasse edtja lissine sjïere heannadimmieh akten stuerebe ektiedæmman bïejedh, jïh analyseradidh mah konsekvensh ovmessie politihkeles nænnoestimmieh utnieh dan akten almetjen aarkebeajjan.
Vijriesåbpoe dle NRK Sápmin saernieh edtjieh aaj vïedteldihkie årrodh saemien aarkebeajjan jïh rïektes heannadimmide, men edtja aaj seamma tïjjen vuesiehtidh mijjieh akte sjïehtesjamme bielie aktede noerhtelaanti jïh abpeveartenen saernieguvveste. Daan sjïekenisnie NRK Sápmi joekoen leavloem beaja saernieh åehpiedehtedh jeatjah aalkoealmetjijstie, jïh aalkoealmetji bïjre veartenisnie. NRK Sápmi saernieh bæjhkohte fïerhten biejjien raadijovisnie jïh gaskeviermesne. Maajhvååjnesisnie jïh Teekste-TVsne NRK Sápmi saernieh bæjhkohte gaajhki aarkebiejjiej.
Jeatjah sisvege
NRK Sápmin sisvegefaalenasse edtja bievnedh, evtiedidh, haestedh jïh sjollehtidh goltelæjjide jïh vuartasjæjjide. Sisvegefaalenasse edtja tsåatskelesvoetem feengkedh dan gellijste goltelæjjijste, vuartasjæjjijste jïh utniejijstie goh gåarede abpe laanteste. Programmefaalenasse edtja jeereldihkie årrodh, jïh dam saemien siebriedahkem vuesiehtidh. Vihkeles faalenasse dovne unnebe jïh stuerebe ulmiedåehkieh jaksa. Lissine saernie- jïh aktualiteeteboelhkh, NRK Sápmi gaskem jeatjah dorje: Kultuvreprogrammh, hoksehtimmie- jïh sjollehtimmieprogrammh, dokumentaare- jïh digkiedimmieprogrammh jïh maana- jïh noereprogrammh, mah bæjhkoehtamme sjidtieh dovne raadijovisnie, TVsne jïh gaskeviermesne.
Programmefaalenasse maajhvååjnesisnie lea njieljie maanaprogrammh fïerhten våhkoen jïh 10-15 dokumentaare- jïh kultuvreprogrammh fïerhten jaepien. Goh saerniedïenesjisnie, dle vihkeles NRK Sápmin programmefaalenasse beavna jïh evtede saemiej ektievoetem jïh ektiedomtesem dovne jeatjah aalkoealmetjidie jïh jeatjah almetjigujmie abpe veartenisnie.