Vajku NRK Sápmi le unnemus NRK guhtta divisjåvnåjs, de le dat stuorámus sáme mediavidnudahka mij gávnnu. NRK Sáme oajvvekontåvrrå le 1976 rájes læhkám Kárášjogån (Vuonan). NRK Sápmi sáddimtsiekkadus bådij Kárášjohkåj jagen 1984.
Sáme sáddijiddje
Sihke Vuonan, Svierigin ja Suoman li genga sáme sáddijiddje (NRK Sápmi, SR Sameradioen, SVT Sápmi, ja YLE Sápmi). Aktan gåbttji da niellja sáme mediaoase Vuonan, Svierigin ja Suoman ålles sámeednamav (Sápmi) dájn rijkajn, ja sij aj buvtadi moadda sáddagijt aktan. NRK Sápmi le stuorámus dájs nælljásijs.
Oajvvedoajmma: Dahkat mediabuktagijt sámijda
NRK Sáme oajvvedoajmma le dahkat sisadnofálaldagájt sáme álmmugij, valla divisjåvnnå aj galggá buktet máhtov ja diedojt sáme sebrudagá birra dåj nuppij álmmugijda.
NRK Sáme jahkediedádusán (2012) tjuodtju náv (jårggåluvvam dárogielas): «NRK Sápmi dahká sáme sisanov genga NRK vuogádagán. Sáme divisjåvnån, gænna l oajvvekåntåvrrå Kárášjogån, le oajvvedoajmma fállat sisanov sáme álmmugij. Duodden tjalmostahttá NRK sáme kultuvrav oassen vuona valjesvuodas dokumentárarájdoj ja ájnegisprográmmaj baktu.
«NRK Sámi Radio galggá doajmmat degu unnep sáddijiddjen sámijda (åvdep prográmmadirektørra NRK:an, Reidar Hirsti, NRK Sáme birra NRK:a rámmaplánan jagen 1983).»
NRK Sáme ulmme
Ietjas ulmme birra javllá NRK Sápmi náv: «NRK Sápmi galggá ietjas prográmmadåjmaj baktu vájkkudit vaj sáme bessi ja sihti liehket sábmen, ja rijka duodde álmmuk galggá oadtjot lasse diedojit sámij, sáme kultuvra ja sebrudagá birra.»
NRK Sáme strategian ietján tjuodtju náv: “NRK Sápmi galggá liehket dat njunnjusasj buvtadiddje ja almmudiddje sámegiela sisadnuj, subtsastit sáme subttsasijt, aktan adnalit sáme sebrudagáv, ja doajmmat sáme sadjen ådåsijda, kultuvrraj, hávsskudahttemij, ja sisano mánájda ja nuorajda.”
Álggoálmmukaktisasjbarggo
NRK Sápmi le 2003 rájes gæhttjalam åvdedit aktisasjbargov álggoálmmuksáddijiddjij gaskan lasedittjat álggoálmmugaådåsijt ja prográmmajt sihke ietjas sáddagijn ja NRK:a ietjá prográmmafálaldagájn.
Jagen 2008 vuododuváj værálda álggoálmmugasáddijiddjeværmádahka. Dan værmádagá namma l World Indigenous Television Broadcasters Network (WITBN), ja værmádagán li 14 ájrrasa, aktan NRK Sápmi (2013). 2012 rájes gitta 2014 rádjáj le NRK Sáme oajvve, Nils Johan Heatta, værmádagá jådediddje, ja værmádagá dåjmadahka l sirdeduvvam Taipeias, Taiwanas NRK Sáme oajvvekåntåvråj Kárášjohkåj dán ájggegávdan. Værmádahka galggá åvdedit aktisasjbargov prográmmadahkamij, prográmmaåvdedibmáj ja prográmmalånudallamij. Jagen 2012 vuododuváj teknologalasj tjoavdos bæjválasj prográmmalånudallamijda 14 WITBN ájrrasij gaskan.
Prográmma ja ietjá sisadnofálaldagá
NRK:a almulasj giela le dárogiella ja sámegiella. Stuorámus oasse NRK Sáme rádio- ja TV-sáddaga li nuorttasámegiellaj, valla li aj stuoves sáddaga julev- ja oarjjelsámegiellaj. NRK Sáme avtatrajes ådåsa internehtan li sihke dárogiellaj ja genga sámegiellasuorgijda (ma muhtem mærráj li nav sierralágátja jut dåhkki dajt sierra giellan gåhtjudit).
Ådåsa
NRK Sáme barggá dan ulme milta jut sámegielaga galggi prinsihpalattjat bessat gullat ájnnasamos ådåsijt sámegiellaj. NRK Sáme ådåsdievnastus galggá vaddet ájnnasamos ådåsijt. Ådåsfálaldahka galggá duodden aj biedjat ájnegis dáhpádusájt oassen stuoráp aktisasjvuohtaj, ja guoradallat gåktu politihkalasj mærrádusá vájkkudi ájnegis ulmutjij árggabiejvev.
Duodden galggi NRK Sáme ådåsa tjanáduvvat sáme árggabæjvváj ja almmavuohtaj, ja sæmmi båttå galggi aj vuosedit mij lip oassen nuorttarijkaj ja globála ådåsgåvån. Dan aktijvuodan NRK Sápmi sierraláhkáj dættot åvddånbuktet ådåsijt álggoalmmugijs ja álggoálmmugij birra væráldav miehtáj. NRK Sápmi almot ådåsijt bæjválattjat rádion ja internehtan. TV:an ja Tekst-TV:an almoduvvi ådåsa árggabiejvijt.
Sisadno ietján
NRK Sáme fálaldagá galggi diededit, åvddånahttet, hasodit ja hávsskudahttet álmmugav. Fálaldagá galggi oadtjot nav ålov gulldaliddjijs, gæhttjijs ja addnijs berustittjat gå máhttelis rijkav miehtáj. Radiofálaldagá galggá liehket muohttelágátja ja gåvvit sáme sebrudagáv. Ájnas le fálaldagá jåksi unnep ja stuoráp ulmmejuohkusijt. Duodden ådås-, ja ájggeguovddelis åsijda dahká NRK Sápmi ierit ietján: Kulturprográmmajt, dievnastus- ja ávvudahttemprográmmajt, dokumentárra- ja dágástallamprográmmajt, ja mánáj- ja nuorajprográmmajt, ma almoduvvi sihke rádion, TV:an ja internehtan.
TV:a prográmmafálaldagán li niellja vahkkusasj mánájprográmma, ja 10-15 dokumentárra- ja kultuvrraprográmma jahkáj. Degu ådåsprográmmajn, le ájnas jut NRK Sápmi åvddånbuktá ja åvddånahttá sámijt aktisattjat gullumin nuppij álggoálmmugij væráldav miehtáj.