Elle Sofe Sara oaččui Kritiker-bálkkašumi
Sámi koreográfa Elle Sofe Sara oaččui Kritikerprisen 2022 dansun-bálkkašumi. Son vuittii bálkkašumi bihtáin «Vástadus eana – The answer is land». Bálkkašupmi juhkkojuvvui Oslos ja lea Norsk kritikerlag geat juhket bálkkašumi.
Jury árvvoštallamis deattuhit ahte bihtáin nákcejit Sara ja su mielbargit čájehit olbmuid gullevašvuođa ja sajádaga servodagas. Dánsuma bokte govviduvvo movt olmmoš ge sáhttá vásihit ahte massá oadjebasvuođa eallimis ja movt olmmoš ohcala gullevašvuođa eallimis.
Dát dovddut leat erenoamáš áigeguovdilat vel dán váttis áiggis máilmmis, deattuhuvvui bálkkašumi geigemis.
– Lea stuorra gudni oažžut bálkkašumi ja mun juogadan dan buohkaiguin geat leat bargan bihtáin, logai Elle Sofe Sara.
Son lohká iežas leat giitevažžan go eallá dakkár guovllus máilmmis gos lea friddjavuohta, ja gos son dáidagiin beassá dákkár dovdduid čájehit.
Elle Sofe Sara lea maid giitevaš go oaidná ahte dáidda mearkkaša olbmuide olu, erenoamážit dán váttis dilis mii lea dál.
Vuoitu lea dáidda maid Tom Gundersen lea ráhkadan.
