Luossa ja ruoššaluossa mearas ja jogas oktanaga

– Bivdostatistihkat orrot čájeheame ahte luossa ja ruoššaluossa orrot rittus ja jogain seamma áigge, dadjá Norgga luonddudutkaninstituhta (NINA) dutki, Henrik H- Berntsen.

Son lea leamaš mielde dutkamen goas luossa ja ruoššaluossa leat mearas, ja goas dat gorgŋot jogaide.

Norgii bohte gávcci geardde eanet ruoššaluosa 2021:s go 2019:s, ja olles 17 geardde eanet go 2017:s. 208.000 ruoššaluosa goddo ja áicojuvvo norgga jogain ja mearain diibmá.

Nu čállá Norgga luonddudutkaninstituhta (NINA) preassadieđáhusas. Ruoššaluossa goargŋu jogaide juohke nuppi jagi.