Roggan hávddiin 1915 - dál besset hávdádit dáid ođđasit
Uppsala universiteahta oaivvilda vejolažžan máhcahit váinniid dávttiid ja oaiveskálžžuid Sápmái, máid leat roggan 1915 Rounalas Davvi-Ruoŧas. Rounala hávdeeatnamis Gáresavvona davábealde rogge 18 olbmo dávttiid ja oaiveskálžžuid 1915:is. Ruoŧa sámediggi lea dán jagi ođđajagimánus bivdán virggálaččat dáid máhcahuvvot Sápmái vai besset daid ođđasit hávdádit seamma hávdeeatnamii gos dat leat vižžon. Loahpalaččat máhcaheamis mearrida oahppodepartemeanta, nu čállá SR Sápmi.