Vuosttaš eamiálbmot nisu mátkkošta gomuvuhtii
Dán čavčča astronávta Nicole Aunapu Mann mátkkošta gomuvuhtii, ja lea vuosttaš amerihkálaš eamiálbmotnisu guhte dahká dan, čállá Indian Country Today ođasdoaimmahat. Mann galgá jođihit SpaceX Crew-5 barggu go njeallje astronávtta vulget čakčamánu 29. beaivve Internationála gomuvuođastašuvdnii.
- Lea hui miellagiddevaš. Mu mielas lea dehálaš mii muitalit min servodahkii dán birra, vai eamiálbmot nuorat geat soitet jurddašit ahte dát ii leat vejolaš olahit, fuomášit ahte dološ hehttehusat leat jávkamin, dadjá Nicole Aunapu Mann Indian Country Today ođasdoaimmahahkii.