Klemetspelet álgá odne
Odne besset olbmot vásihit Klemetspelet nammasaš čájálmasa Hemnes gielddas Nordlánddas.
Dát čájálmas lea Klemet Persona birra guhte bearrašiinnis ásai bákteráiggis Leirskardalenis lahka Korgen čoahkkebáikki.
Klemet Persson lei sápmelaš gii elii mannan čuohtejagis Davvi-Norggas. Son lei dovddus leat leaikkas albmáin, ja dan guovllu olbmot gal vissá leat gullan albmá birra, go odne vel dat máidnasat muitaluvvot Klemeta birra. Klemet orui eamidiinnis Annan maŋemuš jagiid Leirskarvákkis.
Čájálmasa váldoneavttárat leat Sverre Porsanger guhte neaktá Klemeta ja Inga Márjá Sarre guhte neaktá ges Anna. Kulturfestivála Klemetspelet álgá odne ja bistá borgemáno 21. beaivái.