Berre ein månad etter dei nye bomstasjonane hadde opna på Nord-Jæren i april 2001 stod Jan Inge Iversen på Rege og forklarar korleis han skal unngå det nye problemet.
– Her skal innkøyrsla vera, og der borte skal utkøyrsla vera.
Han hadde fått ein entreprenør til å levera masse, og grunnarbeidet for ein ny privat veg rundt bomstasjonen var allereie som smått i gang. Bomstasjonen låg på Iversen sin veg til jobb, og i tillegg var han grunnleggjande usamd i bomstasjonane.
Blei ingen veg
I fjernsynssaka som blei laga i 2001 fortel han om planane sine, og bilistane som blei intervjua var positive til initiativet. Men planane blei aldri noko av.
– Eg hugsar at dei truga med å setja opp pålar på tomta mi for å stoppa meg, men då sa eg at dei ville bli fjerna og plasserte på bomstasjonen, fortel Iversen i dag.
– Men kvifor blei det ikkje noko av planane?
– Eg innsåg at det ikkje var håp då entreprenøren ringde meg og sa at dei ikkje torde levera masse til meg, fortel han.
Han er medlem av protestgruppa som i 2018 har gjennomført fleire nye bomprotestar, men er uviss på om dei klarer å få gjennomslag for ønska sine.
Fleire TV-saker om bomstasjonar i Rogaland
Så lenge det har vore bommar, har det truleg også vore folk som er irriterte på dei. Her er eit par andre bompengeinnslag som har vore i NRK Rogaland dei siste åra.