– To telt med to soverom, slik fartar me rundt. Og me søv kjempegodt sjølv om det regnar ute, forkynner Kenneth Haugland som har køyrt frå Bergen til Rogaland med fem barn for å telta.
Utfor duk-døra sit familien rundt eit campingbord i graset, slappar av og spelar yatzy. Turen var eit spontant innfall ifølge Haugland.
– Då er det veldig greitt å berre hiva med seg teltet og reisa, forklarer han, og legg til at teltferie er heilt topp. Det synet deler stadig fleire.
- Les også: Komfortabel camping- trend
- Les også: Trendy med camping
Folk i alle aldrar
– Dei siste to åra har me opplevd ei sterk auke i telting, seier eigar av Ølberg camping, Ragnar Oftedal. Fleire campingplassar i distriktet bekreftar det same.
Naturopplevingar, enkelheit og barndomsminner er moglege grunnar til trenda, trur han.
– Det å bu i telt har blitt populært, ikkje berre blant ungdomar, men også godt vaksne folk og mykje barnefamiliar, utdjupar han.
Ragnar Oftedal og kona Kristine har merka seg stadig fleire telte-gjester dei siste to åra.
Foto: Ine Eftestøl / NRKTelta folk ferierer i varierer frå små fjelltelt til store luksustelt med fleire rom ifølge campingplasseigaren.
- Les også: Dette må du huske på når du skal på telttur
- Les også: Friluftsliv lokker mange i sommerferien
Natur og opplevingar
– Eg går ut ifrå at folk har lyst til å oppleva enklare kår. Dei kjem jo nært på naturen, og høyrer kvart vindpust og kvar regndrope som fell, seier Oftedal.
I tillegg trur han mange foreldre har lyst til å dela telte-opplevinga med ungane sine.
– Det er noko ungar set pris på, og som dei vil huska heile livet, meiner han.
Eigar av Haraldshaugen camping i Haugesund, Jon Arne Waage har òg merka seg den nye trenda, og trur det har meir med kjensler enn økonomi å gjera.
– Folk kan koma her med ein Audi til over millionen og spør etter teltplass. Det er jo litt artig, meiner han.
Og om elementa ikkje vil spela på lag, teltet er blaut, eingongsgrillen har blåse vekk og ungane går sure?
– Då pakkar du berre teltet og reiser heim! ler Haugland hjarteleg, og skuar med mjukt sommarblikk over ein campingplass med kvilepuls.
