19-åringen som køyrde av vegen på fylkesveg 333 Espelandsvegen laurdag kveld døydde av skadane melder Stavanger universitetssjukehus sundag morgon.
– Han var frå Ryfylke, men namn er ennå ikkje frigjeve, då politiet framleis arbeider med å få underretta alle pårørande, seier operasjonsleiar i Sør-Vest politidistrikt, Tor Helge Stavik til NRK.
Meldinga om ulukka kom laurdag kveld klokka 19.54. Det var politiet som melde om ei utforkøyring, og alle naudetatar rykka ut.
Krasja i tre
Då politi og brannvesen kom til staden sat mannen fastklemd i bilen og måtte hjelpast ut av brannvesenet ifølge operasjonsleiar Trygve Ravndal i Sør-Vest politidistrikt.
Brannvesenet melde om røykutvikling, men ingen brann. Mannen var aleine i bilen då han køyrde av vegen og krasja i eit tre.
Vidare etterforsking
Etter å ha blitt klippa ut av bilen av brannvesenet blei han frakta til sjukehuset med luftambulanse, men livet stod ikkje til å redda.
Operasjonsleiaren kan sundag morgon ikkje seie noko om årsaka til ulukka, som er under vidare etterforsking.
– Krimteknikarar og vegvesenet undersøker ulukkesstaden, og det blei teke blodprøvar, men eg kjenner ikkje til meldingar om rus, seier Stavik.
