Det var i Stavanger og Mandal ekstremvêret «Didrik» herja mest i natt, før havnivået gjekk ned igjen. I ettermiddag steig havet igjen, og på Vestlandet var farenivået oransje.
Det betyr at ein måtte vera førebudde på alvorlege situasjonar.
– Denne stormfloda skal nå toppen i 14-tida i dag, før han trekker seg tilbake, sa statsmeteorolog Geir Ottar Fagerlid i forkant.
– Ikkje fullstendig kontroll
I Bergen var flaumtoppen venta klokka 14.15. På Bryggen stod brannvesenet klare i tilfelle det skulle bli naudsynt med grep for å sikre dei historiske bygga.
Vatnet pipla opp frå trelemmane i golvet.
– Me har ikkje fullstendig kontroll, men sidan husa står på pålar, finner vatnet vegen ut igjen, seier Jan Aase, innsatsleiar i brannvesenet.
Før vatnet steig i natt, hadde brannvesenet lagt ut flombarrierar og sandsekkar.
– Me hadde klart oss utan, men me vil heller gjere eit tiltak for mykje enn eitt for lite, seier Aase.
Mindre i sør, meir i nord
I Stavanger venta dei med å ta ned den kvite «flaumpølsa», som har blitt rulla ut for å unngå skadar på bygga i Vågen.
– Vi tar ikkje ned flaumvernet ennå, men når vatnet trekker seg tilbake kan me rigga ned, seier beredskapssjef Torstein Nielsen i Stavanger kommune.
Sør på Vestlandet var det venta lågare nivå enn i natt, men på stasjonane på Måløy, Ålesund og Kristiansund skulle vasstanden bli høgare.
Mange skodelystne hadde tatt turen til Bryggen i Bergen for å sjå på stormfloda.Toppen i ettermiddag blei like høg som i natt.
– Vi kan pakke saman her, seier innsatsleiar Aase.
Slik var prognosane for i ettermiddag (centimeter over sjøkart-null):
- Stavanger: 162 cm (166 cm i natt)
- Bergen: 221 cm (222 cm i natt)
- Måløy: 272 cm (264 cm i natt)
- Ålesund: 286 cm (269 cm i natt)
- Kristiansund: 292 cm (275 cm i natt)
Elles er farevarselet på gult nivå i Trøndelag. Langs kysten aust for Rogaland har stormfloda trekt seg tilbake.
Nøgd med prognosane
Sjølv om ikkje konsekvensane av «Didrik» blei like store som frykta, seier Fagerlid at meteorologane sine prognosar for natta var gode. Utanom på Tregde, der dei bomma litt.
Ein grunn til at nivået hamna litt under prognosane kan vera at vinden ikkje kom på same tid som springfloda, forklarer Fagerlid.
Få skademeldingar
Så langt har det kome inn mange skademeldingar etter «Didrik» melder forsikringsselskapet Gjensidige.
– Vi har mottatt om lag ti meldingar som i hovudsak gjeld vatn i kjellarar, seier kommunikasjonssjef, Bjarne Rysstad, i Gjensidige.
Dei er likevel førebudde på at det kan koma fleire skademeldingar. Både på grunn av stormfloda i ettermiddag, men også sidan mange er seine med å melda inn.
– Det vil bli eit etterslep dei nærmaste dagane, seier han.
Rysstad oppfordrar dei som er ramma til raskt å ta kontakt, for å setja i gang prosessen med sanering, tørking og reparasjon.