Ingen pengar til sjøvett-video

Det er over to år sidan næringssjefen i Sokndal lanserte ideen om ein instruksjonsvideo om sjøvett. Førebels har ingen sett syn på å støtta prosjektet.

Mange ulykker på sjøen i Sokndal.

Sjå video: Sokndal er på ny råka av ein dramatisk redningsaksjon til sjøs.

Det siste døgnet er kommunen på ny råka av ein dramatisk rednings-aksjon til sjøs.

Ein tysk fisketurist blei sitjande på kjølen på båten sin i 17 timar etter at han kantra båten utanfor Rekefjord i Sokndal onsdag kveld.

I 10-tida torsdag blei han berga i land i god behald etter ei lang, våt og kald natt.

Fire dødsulukker

58-åringen frå Tyskland var heldig og overlevde. Ikkje alle har vore like heldige. Sidan 2004 har det vore fire dødsulukker på sjøen i Sokndal kommune, der utanlandske turistar har vore råka.

  • 2010: To polske dykkarar omkom.
  • 2009: Ein tysk fiskar omkom.
  • 2008: Ein russisk sjømann omkom.
  • 2004: Tre tyske fiskarar omkom.

Etter ulukka i Jøssingfjord 3. mai lanserte næringssjefen i Sokndal ideen om å laga ein video til dei utanlandske turistane om faren til sjøs.

Trond Arne Pedersen, ordfører i Sokndal (KrF)

Trond Arne Pedersen, ordførar i Sokndal.

Foto: Ole Andreas Bø / NRK

Men til nå har ingen forsikringsselskap ønska å stilla med middel til det som etter planen skal bli ein nasjonal kampanje for betre tryggleik på sjøen.

– Me har søkt forskjellige stiftingar om pengar, men førebels har ingenting skjedd, seier ordførar i Sokndal, Trond Arne Pedersen (KrF).

Barsk natur

Pedersen seier kommunen kontinuerleg arbeider med å skaffa pengar til informasjonsvideoen og at dette er eit viktig arbeid.

– Det viktigaste er likevel at turistane har godt utstyr, skikkelege båtar med gode motorar, understrekar han.

Ordføraren seier dei som leiger ut båtutstyr i kommunen er blitt flinkare med åra, og at ein er blitt meir bevisste på å ha ting i orden.

– Naturen i Sokndal er barsk med ope hav. Det gjer det vanskeleg å vera heilt trygg på sjøen.