Full fyr i låve i Haugesund – politiet trur brannen var påsett

– Det var ikkje påkopla straum til låven, og den var heller ikkje i bruk. Derfor mistenker politiet at brannen kan vera påsett, seier operasjonsleiar i Sørvest politidistrikt, Dag Steinkopf.

Klokka 03.25 natt til fredag fekk naudetatane melding om at det brann i ein låve på Raglamyr, sentralt i Haugesund.

Politiet skriv i ein pressemelding fredag formiddag at dei held alle moglegheiter opne med tanke på årsak.

– Vi er interesserte i vitne som har vore i området der loven har brent frå midnatt og fram til klokka 03.30, seier politifagleg etterforskningsleiar Øyvind Tveit ved felles straffesaksinntak (FSI) i Sør-Vest politidistrikt.

Låven stod berre 30 meter frå eit byggefelt, bak Amanda Storsenter.

– Det bles kuling i kasta. Gnistregnet gjorde at det var fare for spreiing av brannen til byggefeltet, seier innsatsleiar i Haugesund brannvesen, Torgrim Jørgensen.

Per nå er ingen sikta eller mistenkt i saka.

Øyvind Tveit i FSI seier dei undersøker brannen.

– Vi er interesserte i å finne ut kva som har skjedd, og kva som starta denne brannen.

– Mistenker dykk at den har blitt påsett?

– Vi held alle moglegheiter opne. Det er ein av moglegheitene, men per nå kan vi ikkje si noko meir om kva som er årsaka.

Skadeleg asbest-røyk

Dette gjorde at brannvesenet kalla ut alt mannskap i nærleiken.

– Me trykte på den store knappen. Me tok ut mannskap frå to brannstasjonar. I tillegg kalla me inn mannskap som hadde fri, seier Jørgensen.

Det var også asbestplater på bygget som gjorde at brannvesenet frykta at røyken frå brannen kunne vera skadeleg for naboane i byggefeltet.

– Den faren er ikkje lengre til stades, opplyser innsatsleiar Jørgensen, rett over klokka 05 fredag morgon.

Vakthald på brannstaden

Då har delar av låven brent ned og brannvesenet har kontroll. Dei kjem likevel til å ha vakthald på staden ei god stund framover.

– Brannvesenet har også vore inne i delar av låven utan å finne verken dyr eller folk, seier Jørgensen.

Det er fare for at bygget kan rase, så brannvesenet kan ikkje ta seg inn i heile bygget.