Klokka 18.57 fekk politiet melding om ein bubil som hadde køyrd i sjøen utanfor båthamna ved Tungenes fyr i Randaberg i Rogaland.
Det blei sett i verk redningsaksjon og det var ei stund uvisst om det var personar i bilen.
Redningsskøyta «Sjømann» blei sendt til staden saman med dykkarar frå brannvesenet.
Ei rekkje andre ressursar blei sett inn i søket etter bilen som flaut i sjøen eit stykke frå land.
Hovudredningssentralen Sør-Noreg (HRS) på Sola koordinerte redningsaksjonen.
Biletet av bubilen tatt frå redningsskøyta «Sjømann».
Foto: RS Sjømann/RedningsselskapetIkkje folk i bubilen
Litt før klokka 20.30 stadfestar politiet sin innsatsleiar Tom Erik Birkeland overfor NRK at det ikkje var folk i bubilen.
– Ut frå informasjonen me har, er det ikkje grunn til å tru at det var personar i bilen. Det har heller ikkje vore personar i bilen då den gjekk på sjøen, seier Birkeland.
Han seier brannvesenet har gjort undersøkingar med dykkarar.
– Kan det sjå ut som dette er gjort med vilje, at bubilen er køyrd på sjøen?
– Det blir for tidleg å spekulera i kvifor bilen hamna på sjøen. Me jobbar med etterretning for å finna ut kva som har skjedd, seier Birkeland.
Klokka 20.45 blei redningsaksjonen avslutta sidan det ikkje er grunn til å tru at det er personar i sjøen, melder HRS.
Bubilen blir slept inn til ei eigna hamn.
Denne porten blei køyrd ned i kveld, like ved der bubilen hamna i sjøen ved Tungenes fyr.
Foto: Kaj Hjertenes / NRK