Åtvarar mot bruk av kinesiske lykter

Det var i 22.30-tida torsdag kveld brannvesenet fekk melding frå eit vitne som observerte eit raudt lys ved Kvalsvik.

Dette blei tolka som ein naudrakett og hovudredningssentralen sette i gang redningsaksjon i området.

Feil observasjon

Det var gode søkeforhold i området og etter 35 minutt kunne redningsskøyta slå fast at det høgst sannsynleg ikkje var nokon som var i nød.

Etter nærmare samtalar med vintnet som melde frå om hendinga, tyder det på at det var ei kinesisk lykt som blei observert – ikkje ein naudrakett.

Ber folk vera forsiktige med bruken

Kinesiske lykter er populære, spesielt i samband med nyttårsfeiringa. Men dei er svært brannfarlege og Direktoratet for samfunnstryggleik og beredskap vurderer eit nasjonalt forbod mot lyktene.

I tillegg har dei ført til ei rekkje unødvendige redningsaksjonar, slik som i Kvalsvik-området i går.

– Derfor minner me på ny om at lyktene lett kan forvekslast med naudrakettar. Folk må derfor vera svært varsame med bruken, spesielt i kystområde, seier operasjonsleiar i Haugaland og Sunnhordland politidistrikt, Jarle Utne-Reitan.