Rett etter midnatt fekk brannvesenet i Stavanger melding om brann i eit rekkehus i Mjukhauglia i bydelen Kvernevik.
Dette huset var eitt i ei rekke på fem.
– Det starta truleg i ein av leilegheitene i midten og har spreidd seg gjennom taket og ut til totalt fire av leilegheitene, seier vakthavande brannsjef Frode Strøm til NRK klokka 05 fredag morgon.
Brannen Mjukhauglia i Kvernevik bydel i Stavanger starta truleg i ein av leilegheitene i midten og spreidde seg gjennom taket.
Foto: Heidi Karin Gilje SkogStrøm overlèt til politiet å seie noko om årsaka til brannen, men han opplyser at alle dei som budde i dei fem rekkehusa er evakuert og gjort greie for.
Til saman er 32 personar nå innlosjerte i husvære i nærleiken av brannstaden.
Stod i full fyr
Det var god fyr i den første leilegheita då brannvesenet kom på plass rett etter midnatt.
– Den andre leilegheita tok fyr innan kort tid og rekkehus nummer tre og fire blei også øydelagde, fortel vakthavande brannsjef Frode Strøm.
Då NRK snakka med Strøm i 05-tida kjempa brannvesenet for å berge det femte huset i rekka.
Om lag klokka 06.30 kom meldinga om at brannen nå var sløkt.
– Sløkkearbeidet går føre seg ennå. Brannen har roa seg ned, men sløkkinga kjem til å halde på framover i morgontimane, seier Strøm.
Eldre hus
Dei fem rekkehusa er frå 1980-talet.
Fleire naboar har fått SMS-melding frå brannvesenet om å lukke vindauga slik at ikkje røyken frå brannen kjem inn i huset.
