NRK Meny
Normal

Kabintilsette i Norwegian overførte til nytt selskap

Dei kabintilsette i Norwegian blir overførte til eit nytt selskap, Cabin Services Norway AS. Overtakinga skjer om to veker, 31. mars.

Bjørn Kjos, Norwegian

Bjørn Kjos og Norwegian har overført dei kabintilsette til eit nytt selskap, Cabin Services Norway AS.

Foto: Maja Suslin / SCANPIX

Det gjekk i dag ut eit brev frå administrerande direktør i Norwegian Air Shuttle, Bjørn Kjos og styreleiar for det nye selskapet, Krister Aarnio, til alle kabintilsette om at dei blir overførte til eit nytt selskap.

Også dei kabintilsette i Danmark vil blir overførte til eit nytt selskap.

Tilpassing

I brevet heiter det blant anna at omorganiseringa skjer for å få ein selskaps- og driftsorganisasjon som er betre tilpassa storleiken på konsernet og den internasjonale satsinga, inkludert å leggje til rette for drifta som Norwegians store flyordre vil medføre. Norwegian Air Shuttle skal i framtida ikkje drive operativ flyverksemd, heiter det i brevet til dei tilsette.

Dei tilsette får 14 dagars frist til å klage på avgjerda, altså reservere seg, sik at dei som vil kan slutte utan å vere bundne av vanleg oppseiingsfrist. Det blir presisert at ein slik reservasjon ikkje vil gi nokon rett til å vidareføre arbeidsforholdet med Norwegian Air Shuttle.

– Varsla i oktober

Informasjonsdirektør Anne-Sissel Skånevik i Norwegian opplyser til Dagens Næringsliv at endringane vart varsla alt i oktober i fjor, at dei har vorte drøfta på vanleg måte med fagforeiningane.

Det har ikkje lukkast NRK i kveld å få ein kommentar frå dei tillitsvalde for dei kabintilsette i Norwegian.

LES OGSÅ: Norwegian med underskudd

LES OGSÅ: – Norwegian bør få fly på EU-lisens

LES OGSÅ: Rekordmange klager på Norwegians flyproblemer

LES OGSÅ: Fagforeningsledere fra USA og Europa i Oslo for å drøfte Norwegian

LES OGSÅ: Sterk oppgang for Norwegian i oktober