– Det er mange flinke journalistar som brukar nynorsk, og eg håpar folk vil sende oss gode nominasjonar. Det vil gje oss eit godt utgangspunkt for å finne ein verdig vinnar også i år, seier Solveig Barstad.
Ho er leiar for juryen til Kultur- og likestillingsdepartementet sin nynorskpris for journalistar. Prisen skal gå til ein dyktig journalist som har utmerkt seg med bruk av levande og god nynorsk i norske medium, og som gjennom arbeidet sitt har gjeve nynorsken status og innpass på nye område.
Send forslag innan 1. april
Veit du om ein journalist som brukar nynorsk på ein særleg flott måte – eller kanskje på uvanlege saksområde? Har du ein nynorsk-favoritt i lokalavisa di? Eller kanskje du vil heidre ein journalist som i fleire år har vore eit språkleg føredøme?
Send oss forslag til kandidatar ved å klikke på lenka under! Fristen for å komme med forslag er fredag 1. april.
I fjor fekk speljournalisten Øystein Furevik i gamer.no den gjeve utmerkinga. Prisen er på 75.000 kroner og eit kunstverk.
«I over 20 år har Furevik standhaftig drive journalistisk nybrotsarbeid på eit område der det er lite norsk og minimalt med nynorsk. Det at Furevik er godt synleg i det viktigaste norskspråklege organet for ein stor og viktig kulturarena, er umåteleg verdifullt for nynorsken», skreiv juryen i grunngjevinga for prisen.
– Dette er ei anerkjenning eg blir heilt rørt av. Eg er kjempestolt. Det er verkeleg stort for meg, sa Øystein Furevik.
Nokre av dei nylege vinnarane
Blant dei tidlegare vinnarane finn vi kjende namn som Roger Sevrin Bruland (NRK), Arill Riise (TV 2), Jon Hustad (Dag og Tid), Ingunn Solheim (NRK), Siri Kleiven Strøm (TV 2), Linda Eide (NRK), Ronny Brede Aase (NRK) – og mange andre innanfor både aviser, radio og TV.
Juryen som skal finne fram til ein vinnar er Solveig Barstad (programleiar og journalist i TV 2), Jens Kihl (kulturredaktør i Bergens Tidende) og Øystein A. Vangsnes (professor ved Universitetet i Tromsø og Høgskulen på Vestlandet).
Og du: Skriv ei utfyllande grunngjeving for kvifor kandidaten din bør vinne prisen. Jo betre grunngjeving – jo større er sjansen for at kandidaten din når opp.