Desse fjellovergangane er stengde
Fleire fjellovergangar er stengde eller har kolonnekøyring, skriv Statens vegvesen. Vegar kan bli stengde på kort tid, og Vegvesenet oppmodar om å la bilen stå.
Desse populære fjellovergangane er stengde:
– Rv. 7 Hardangervidda
– E134 Haukelifjell
– E6 Dovrefjell
– Fv. 50 Hol-Aurland
– Rv. 15 Strynefjellet
Det er kolonnekøyring over Hemsedalsfjellet. På Statens vegvesen kan du halda oversikt over alle fjellovergangangane.
Bergensbanen er framleis stengd, men skal etter planen opna i dag etter å ha vore stengt grunna uvêr.
Vegvesenet åtvarar også om glatte vegar for Sør-, Aust- og Vestlandet.
I tillegg er rasfaren stor over store delar av landet.
I Oslo vil nokre avgangar i kollektivtransporten vera innstilte grunna bussmangel som følgje av forholda måndag. Rundt 30 bussavgangar er innstilte tidleg tysdag morgon. T-banen og trikken køyrer som normalt.
Bildet er teke på E6 ved Hjerkinn på Dovrefjell tysdag morgon.
