Stortinget arbeider med regjeringa sitt forslag til ny ekteskapslov, som gir homofile og heterofile same rett til å gifte seg.
- Ein god ide!
Lova har skapt uro i kyrkja. Derfor ønskjer blant anna Venstre ei ordning der trussamfunna ikkje lenger skal vie folk, men berre foreta ein velsigning etter at ekteskap er inngått juridisk.
- Då vil ikkje folk føle seg så tråkka på som den prosessen her har ført til, seier nestleiar i Venstre, Trine Skei Grande.
Då det var høyring om den nye ekteskapslova i Stortinget bad mellom anna Norges Kristne Råd, som representerer alt frå pinsevener til katolikkar, uttrykk for at ei slik ordning kan vere ein god ide.
- Dårleg utgreeing
Derfor har både KrF og Venstre sendt brev til departementet der dei ber ho greie ut forslaget om obligatorisk borgarleg vigsel. May Helen Molvær Grimstad i KrF meiner ei slik løysing kan bli aktuell.
- Det er ei aktuell problemstilling, og viser kor dårleg ekteskapslova er utgreia. Vi synes det er viktig at dette blir belyst grundig før Stortinget tek ei avgjerd i saka, seier Grimstad.
Barne- og likestillingsminister Anniken Huitfeldt, meiner det ikkje var naturleg å greie ut dette spørsmålet i samband med arbeidet med den nye ekteskapslova.
- Dei endringane vi foreslår i ekteskapslova er knyta til homofilt ekteskap. Det har ikkje vore nokon full utgreiing av heile ekteskapsloven. Dersom Stortinget ber oss om å greie ut obligatorisk borgarleg vigsel, så skal vi gjere det, seier ho.
- Tungvint løysing
Huitfeldt håpar likevel at ho slepp å greie ut spørsmålet om obligatorisk borgarleg vigsel.
- Vi ser ikkje på ei slik innføring som hensiktsmessig. Mange vil føle det er tungvint å gifte seg i tinghuset før ein giftar seg i kyrkja, meiner ho.
Trine Skei Grande er heilt sikker på at Venstre skal få gjennomslag for sin modell til slutt.
- Den er ryddig, rettferdig og den klarar også å skape respekt for at tru også er knyta til synet på ekteskapet si rolle i samfunnet, seier ho.