Stoltenberg møter pressa etter valsigeren

Saka oppsummert:

Jens Stoltenberg er motiverttil å halde fram som finansminister og takkar for tilliten frå statsminister Jonas Gahr Støre.
Regjeringa inviterer dei andre partia på Stortinget til eit breitt forlik om ein heilskapleg skattereform for å sikre føreseielegheit for både næringsliv og familiar.
Stoltenberg ønsker å opprette ein skattekommisjon for å utarbeide ein skattepolitikk med brei politisk støtte. Målet er å få dette på plass i løpet av neste år.
Regjeringa er open for å sjå på endringar i formuesskatten som ein del av ein heilskapleg reform.
Auka global usikkerheit gjer det viktig å sikre økonomisk stabilitet i Noreg, ifølgje Stoltenberg.
Forslaget om skattekommisjon har møtt kritikk frå fleire parti, men har støtte frå MDG og Raudt.

Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.

Tysdag møter Jens Stoltenberg pressa, etter venstresida sin valsiger.

Stoltenberg tok seg tida til å helse på demonstrantane som hadde møtt opp utanfor finansdepartementet.

– Eg er motivert for å halde fram som finansminister i den regjeringa. Og så er det jo sånn i politikken at ein må ha æva som perspektiv, men vere førebudd på at ting kan skje på kort varsel, seier Stoltenberg.

– Motivert til å halde fram som finansminister

Statsminister Jonas Gahr Støre uttrykte tysdag føremiddag at han ønsker å halde fram med Jens Stoltenberg som finansminister.

– Det har vore eit fantastisk privilegium å ha Jens i regjering, sa Støre.

Stoltenberg takkar alle som har stått på i valkampen for å sigre raudgrøn siger.

– Det er krevjande å bli valt, men enda meir krevjande å bli valt igjen. Denne regjeringa blir attvalt med større tilslutning enn dei fekk første gong dei blei valt, seier Stoltenberg.

Stoltenberg fekk også spørsmål om den såkalla «Jens-effekten».

– Eg er glad for at eg blei bedt om å vere med på dette laget. Eg hadde heilt andre planar i februar, men angrar ikkje eit sekund på at eg sa ja, svarer Stoltenberg.

Stoltenberg på si side er glad for at Støre fortset som statsminister.

– No fortset arbeidet med å halde orden i økonomien, få fleire i jobb og sørge for framleis trygg styring, seier Stoltenberg til NRK.

– Regjeringa står ved invitasjonen til dei andre partia på Stortinget om eit breitt forlik om ein skattereform og vil følge opp dette i den kommande stortingsperioden, legg han til.

Invitasjon om skatteforlik

Statsminister Jonas Gahr Støre gjentok invitasjonen til dei andre partia på Stortinget om eit skatteforlik frå talarstolen på Arbeidarpartiet si valvake.

– Eg gjentar no som støyen frå valkampen er over. Vi gjentar vår invitasjon til ein skattekommisjon, for å gi næringslivet meir føreseielegheit, seier Støre.

Tysdag føremiddag svarer Stoltenberg på spørsmål om skatteforlik.

– Eg er veldig på at både norske verksemder og norske familiar er tent med at vi får eit meir føreseieleg og betre skattesystem. For å få til det i eit splitta politisk landskap, må vi få til eit breitt forlik.

Stoltenberg foreslo i vår ein skattekommisjon.

Ifølgje Finansministeren er målet å finne ein skattepolitikk som det kan vere brei politisk einigheit om.

– Vi vil no sette oss ned med dei andre partia på Stortinget og diskutere korleis vi best mogleg kan legge til rette for eit slikt forlik, legg Stoltenberg til.

Set krav

Då forslaget kom i vår, blei det fort avvist av fleire parti. Erna Solberg kalla det «politisk spinn», mens Sylvi Listhaug meinte utsegna var eit «valkampstunt».

Berre MDG og Raudt var positive til kommisjonen.

No meiner Framstegspartiet (Frp), med Hans Andreas Limi i spissen, at ballen ligg på Arbeidarpartiet sin banehalvdel.

– No må dei synleggjere kva dei ønskjer å invitere til forlik om, som vi andre partia kan ta stilling til, seier Limi.

Frp sine krav er tydelege: dei vil fjerne formuesskatten og senke inntektsskatten.

– Er det mogleg for Frp å bli samde med Ap om kutt i formuesskatten?

– Ja, då må Ap synleggjere kva dei ønskjer å gjennomføre, og så må vi vite at det står seg. Vi kan ikkje risikere at vi skal jobbe med eit skatteforlik, men så plutseleg så kjem det budsjettforhandlingar i Stortinget, og så er alt nullstilt.

Høgre-nestleiar Tina Bru seier dei er opne for breie skatteforlik, men at premissen må vere at skattane går ned.

– Arbeidarpartiet har gitt eit tydeleg løfte om at skattane skal frysast på dagens nivå. Resten av fleirtalet hans har stilt garantiar og ultimatum om at skattane skal ein veg, og det er opp, seier Bru.

Næringslivets Hovedorganisasjon (NHO) vil at arbeidet med eit skatteforlik skal skje fortløpande.

– NHO meiner arbeidet med eit skatteforlik bør starte så raskt som mogleg, seier administrerande direktør i NHO Ole Eirik Almlid til NRK.

Almlid håpar på vilje frå begge politiske fløyer for å få det til.

– Tida er inne for breie forlik og reformer på tvers av dei gamle politiske blokkene, og vi har klare forventningar til det nye stortinget om å bidra til føreseielegheit for næringslivet.

Venstres Abid Raja er positiv til eit forlik.

– Om det skal bli eit slikt breitt forlik så må det bidra til å få ned skattetrykket på norsk eigarskap, hjelpe norske verksemder og norske næringslivsleiarar, og bidra til å hente heim våre skatteflyktningar, seier Raja.

Stoltenberg om formuesskatten

Stoltenberg fekk også spørsmål om dei kjem til å sjå på formuesskatten.

– Ja, som ein del av ein heilskapleg skattereform er vi budd til å sjå på formuesskatt og kapitalskattlegging.

– Årsaka til det er at vi er oppteken av å få til eit forlik. Føreseielegheit og at skattesystem må bli vedlikehalden, legg han til.

I vår sa Stoltenberg at målet var at skatteforliket skal vere klart neste år, slik at det skulle vere med i statsbudsjettet året etter.

No vil ikkje Stoltenberg seie når eit eventuelt forlik kan vere på plass.

– Vi kan jo byrje samtalane med andre parti om korleis vi skal organisere ein skattekommisjon. Jo før vi får til det, jo betre, men om det skjer før eller etter at vi har lagt fram statsbudsjettet, får vi komme tilbake til, seier finansministeren.