Denne veka avslørte Aftenposten at UD godkjende våpeneksport til Emiratane, trass i at landet braut folkeretten. Informasjonen kom frå ein gradert rapport.
No opprettar Nasjonal sikkerheitsmyndigheit, NSM, tilsynssak på bakgrunn av informasjonen som har lekka i media.
– Kompromittering av sikkerheitsgradert informasjon er eit alvorleg brot på lov om nasjonal sikkerheit, og kan ha vesentlege skadefølger, seier avdelingsdirektør Vigdis Grønhaug i NSM til NTB.
Skal kontakte kjelder
Dei har enno ikkje hatt tilgang til den graderte informasjonen, og kjenner saka berre frå omtalen i media.
– Oppgåva vår er å føre tilsyn med sikkerheitstilstanden i verksemder som er underlagt sikkerheitslova. Dette omfattar ikkje Riksrevisjonen, som er eit av organa til Stortinget. Men vi vil no ta kontakt med relevante kjelder for å få saka opplyst best mogleg, seier ho.
Dei som bryt sikkerheitslova med vilje eller er grovt aktlause skal bli straffa med gebyr, tvangsmulkt eller straff.
Aftenposten seier dei valde å publisere opplysningane fordi dei meiner dei var av stor offentleg interesse.
– Det handlar om å gjere dei same presseetiske vurderingane som vi gjer med alle kjelder. Utover det er det naturleg å understreke at kjeldevernet er absolutt, seier nyheitsredaktør Tone Tveøy Strøm-Gundersen i Aftenposten til NTB.
