Hevdar Russland har overført kring 3 milliardar kroner til utanlandske politikarar og parti

– Vi har meldt ifrå til utanlandske politiske parti og kandidatar at dersom dei tek imot russiske pengar og held det hemmeleg, så kan vi og vil vi avdekke det.

Dette seier ein toppfigur i Biden-administrasjonen til Reuters tysdag kveld, på det vilkåret at vedkomande blir verande anonym.

Mottakarane av dei russiske pengetransaksjonane skal vere parti, toppleiarar og politikarar i fleire enn 20 land. Nokre av betalingane skal ha skjedd allereie i 2014.

Anslaget på 3 milliardar kroner er minimum, og ikkje taket, hevdar dei, då landet sannsynlegvis har utført fleire på hemmeleg vis.

Informasjonen som er offentleggjort er berre ein del av rapporten. Amerikanske diplomatar skal ha delt ytterlegare informasjon med fleire enn 100 land, ifølge AFP.

Formålet skal vere å brife desse landa om korleis dei kan motverke russiske påverknadsforsøk.

Fleire millionar til kandidat i Asia

Eitt av eksempla som er oppgitt i rapporten handlar om ein presidentkandidat i eit asiatisk land som ikkje er namngitt, skriv AFP vidare.

Vedkomande skal ha motteke fleire titals millionar kroner frå den russiske ambassadøren i landet.

Utgreiinga skal ikkje ha sett på den amerikanske politikken, men amerikanske styresmakter meiner at ei rekke russiske borgarar freista å påverke valet i 2016.

USA ventar nye dataangrep, spreiing av feilinformasjon og propaganda på sosiale medium før mellomvalet i 2022.

I april svarte over halvparten av amerikanarar meiningsmåling meldt av Reuters at dei frykta russisk innblanding i mellomvalet.

Andre land fryktar innblanding

Rapporten melder at Russland har brukt falske kontraktar og selskap til å finansiere parti, medan statleg eigde selskap har sendt pengar på hemmeleg vis til land i Mellom-Amerika, Asia, Midt-Austen og Nord-Afrika, skriv AFP.

Italiensk etterretning har tidlegare åtvara om at det er fare for russisk innblanding i parlamentsvalet deira 25. september.

På ei liste frå e-tenesta sitt kontrollorgan Copasir, som blei lekka til italienske medium, fanst namna til fleire journalistar, influensarar og politikarar i landet som blei mistenkte for å gå Russland sitt ærend.

– Vi er sårbare for ytre påverknad, og vi veit at blant anna Russland kan spele stygt, sa toppsjefen i Copasir Adolfo Urso i eit utsegn ifølge SVT.

Det er ikkje bekrefta om Italia er eitt av dei 24 landa USA no viser til.

Det kjem heller ikkje fram kor mykje av dei tre milliardane som er brukte i Ukraina, sjølv om president Volodymyr Zelenskyj lenge har hevda at den russiske presidenten har blanda seg inn i ukrainsk politikk.