Viikon tärkkeimät uutiset

Kotimaa

Norja tullee ostamhaan 54 tyskäläistä panssarikulkuneuvoo. Niin ilmoitti turvalisuusministeri, staatinministeri ja finanssiministeri tääpänä pressekonferensissa Ren Leirissä. Syynä oon ette mailma oon vaikkeimassa turvalisuuspoliittisessa tilassa sitte toisen mailmansođan, sannoi Jonas Gahr Støre (Ap)

Ensimäiset kulkuneuvot saađhaan vuona 2026.

Keskiviikkona 1. fepruaarikuuta ruovanhinnat nousthiin hetkeksi lähes kaikissa Norjan kaupoissa. Nousun syynä oli muun muassa korkkeet osto- ja kuljetushinnat. Ostokorin hinta nousi tämän takia keskiviikkona 9 ja 11 prosenttii kallhiimaksi yhđen yön aikana.

Jo tuorestaina Rema 1000 ja Coop Extra kuitenki ilmoitti, ette net tulhaan laskemhaan hinnat samale tasale ko net olthiin januaarikuussa. Syynä oli Kiwi-putikin päätös sen ympäri, ettei se nostanu muitten puttiikkiin tavoin keskiviikkona.

Keskiviikkona oikkeusministeri Emilie Enger Mehl ilmoitti, ette hänelä oli ollu populaarinen Tik Tok programi hänen omassa työtelefoonissa. Sitä häneltä oon kysytty siitä saakka, ko hän oli aijemin sanonu, ette hän käyttää kysheistä appia aktiivisesti.

Moni kuitenki näkkee kiinalaisen sosiaalisen meedia programin vaaralisena oikkeusministerin telefoonissa, koska se kerrää paljon tiettoo sen käyttääjästä. Sitä saatethaan kans käyttää spiunitykötarpheena, meinaa cyberturvalisuuđen faakihenget.

Ilmotuksen jälkhiin Mehl oon saanu paljon kritikkii eri parttiilta ja faakihengiltä.

Norjalainen flyyifirma Flyr ilmoitti tiistaina, ette se mennee konkurshiin. Tämän takia pilettimyyntö loppui samana iltana, ja kaikki firman flyyit lopetethiin lentämisen ja työteliijät menetethiin työnsä.

Asumahuonheitten hinnat nousi kolme prosenttii januaarikuussa, ilmoittaa Eiendom Norge. Eniten hinnat oon kasunu Stavangerissa ja vähitten Tronjamissa.

Mailma

USA ja Kanada oon ilmoittannu, ette het oon havainu spiunipalongin heiđän atosfäärissä. Maat oon seuranu palonkkii keskiviikosta saakka ja sannoo, ette kolmen bussin kokoinen vehjet oon muun muassa lentäny plaanan yli, missä USA pittää sen atomirakettii.

Amerikkalaisen päätösvallan jälkhiin spiunipalonki olis kiinalainen. Het oon hunteerannu jos het tulhaan ampumhaan palongin alas.

Tuorestai iltapäivänä kohđatteli Suomen ja Ruottin staatinministerit Sanna Marin ja Ulf Kristersson Ruottin Stockholmissa. Möötin teemana oli maitten Nato-anomukset. Staatinministerit vahvistethaan, ette maat tulhaan menemhään puolustusliitthoon yhđessä.

– Met aloitimma tämän prosessin yhđessä, ja met haluamma kans päättää sen yhđessä. Se oon koko liiton yhtheinen intressi, ette met tulema jäseniksi yhđessä. Reisun sinne pittää käyđä käsi käđessä.

Moni uskoo, ette Venäjä tullee tekemhään suuren hyökkäyksen Ukrainhaan fepruaarikuussa. Se tullee luultavasti tapahtumhaan 24. fepruaarikuun lähelä, sannoo Ukrainan puolustusministeri Oleksij Reznikov. Silloin siitä oon yksi vuosi, ko Venäjä aloitti sođan maan kans.

– Moskovala oon 500.000 sotamiestä valmhiina suurhyökkäyksheen fepruaarikuussas, sannoo Reznikov BBC:le.

Kaksi norjalaista miestä oon otettu tällä viikola kiini Australiassa. Maan poliisi eppäilee, ette 30 ja 50 vuođen ikhäiset miehet olis freistanu kuljettaa 82 killoo kokainii sallaa maahan.

Ainaki 61 ihmistä kuoli ja noin 175 haavoitu Pakistanissa, ko moskeessa tapattui kova räjähđys. Paikalisen poliisijohtaajan jälkhiin kysheessä oli henki, joka oli räjättäny ittensä. Räjahđys tapahtui ko moskeessa oli menossa iltapäivä rukkous.

Pakistaanilainen Talibaani, Tehreek-e-Taliban Pakistan, oon ilmoittannu olleevansa tevon takana.